Nizan khan Jt. MHIP Kawnpui buatsaihin Human Traficking chungchanga hriattur leh in ven dan inzirtirna, Foreign-a him zawka hnathawh dan inkawhhmuhna Sensitization Workshop chu Venglai YMA Hall, Kawnpui-ah neih a ni.
He hun hi Pu Jimmy Laltlanmawia, Programme Coordinator, CHAN; Pu Jervis Lalramnghaka, Director, Giga Career Training Institute leh Pu Lalsawmzuala, Superintendent, Mizoram Youth Commission ten hmanpuiin zirtirna hi an pe a, Pu Lalmalsawma, OC Kawnpui pawhin a hmanpui bawk a ni.
Pu Jimmy Laltlanmawia chuan Human Traficking hluarna chhan ber chu hna mamawhna vang a ni tiin, Human Traficking lam rawngkaiah chuan Police an kal tur a nilova, YMA emaw NGOs anga thawhchhuahna chi leh Police tha tichak tura tanrualna nena thawhho chi a nih thu a sawi. Human Traficking hian Nawrhchi zawrhna chauh a kawk lova, hnathawh tur inkawh hmuh ang thawk lo te leh naupang kumtlinglo chhawrlui te thlengin a huam vek a ni a ti a, Chhungkaw kehchhia, Nu leh Pa inthen hi a pawi em em a, Nawrhchi zawrhna hmun atanga chhanchhuah 50% te chu Chhungkaw kehchhia atanga intan a ni deuh ber tiin a sawi bawk.
Pu Jervis Lalramnghaka chuan tunlaia Mizo nula ten an intihhmuh Singapore-a Housemaid tura kal chungchangah Burma (Myanmar) atanga kal chu a him loh thu leh Foreign-a kal duh te tana rintlak tak Mizoram-ah Training Centre hrang hrang Mizoram Youth Commission hnuaiah a awm thu te sawi telin, tute emaw sawi avanga liam ve tawp mai lova him taka kal dan zawn a that thu te a sawi a ni.
Pu Lalsawmzuala, Superintendent, Mizoram Youth Commission chuan Mizoram-ah Thalai hnathawh tur neilo an tam avanga ramdang an pan thin avangin MYC chuan Mizo Thalai hna neilo, BPL Family ami te tan an Training Cectre thlan bik pahnih - Social Justice & Development Institution leh Giga Career Training Insitutte-ah a thlawna Training an lak theih nan ruahmanna an siam mek thu he Workshop-ah hian a sawi lang bawk a ni.
Jt. MHIP Kawnpui buatsaih Sensitization Workshop neih a nih dan Pu Lalmalsawma, OC Kawnpui chuan sawi langin tunlai hian Mizoram thalai zingah Singapore-a hnathawh tur tam tak awm anga sawiin, Mizo hmeichhia kal tura thlem kual mektu an awm avangin leh Kawnpui atang pawhin nula 2 chu Burma atanga kal turin an chhuak tawh a; midang pawh la kal leh mai an awm anga sawi anih avang te in zir chianna neih a ni a, an zirchianna ah he thil lo irhchhuah dan hi a him tawk lo thei a hriat a nih avangin he hun hi buatsaih a ni a ti.
