Vawiin khan Champhai DC Conference Hall-ah Champhai District tana ruat Awarness Observer Pu Subramanian IIS hova meeting neih anih bakah Election Expenditure Observer Pu Nitin Wapa IC & CES hovin neih a ni.
Meeting hmasa zawk, Awarness Observer Pu Subramaniam IIS hova neihah hian Media Certificate and Monitoring Committee (MCMC) leh Systematic Voters' Education and Electoral Participation (SVEEP) memberte chuan inthlanpui neih tura an chanvo tul leh mamawhte ruahmanfel thawkhat anih tawh thu tarlangin, Election Commission of India in kaihhruaina dana siam zul zuiin, Champhai DC Office-ah MCMC Cell bunfel anih tawh dan leh Print & Electronic Media kal tlanga thuchhuah reng reng ngun taka thlithlai anih tawh thu tarlan a ni a, SVEEP memberte pawhin Electoral Roll a awm zawng zawngten kim taka Vote an thlak vekna turin zirna in-ah Campus Campaign neih a niin, tlawmngai pawl, MHIP, MUP leh YMA kal tlangin mipui lamah pawh theih ang tawka ngenna leh zirtirna pek anih thu tarlan a ni a, chhan hrang hrang vanga Champhai District chhunga vote tlak that lohna chu zir chian anih thu leh chutiang harsatna chu sutkian an beisei thu an tarlang bawk.
Awarness Observer Pu Subramaniam IIS chuan Mizoram a inthlanpui neih tawh dan thlirin tuntuma inthlanpui neih lehtur pawh hi inthlanna muanawm, fel leh fai taka neih leh theih ngei a beisei thu sawiin, Mizoram People's Forum leh NGO te hmalakna thinna chu fakawm atih thu a sawi bawk. Pu Subramaniam hian vawiin khan Champhai chhuahsanin, Champhai North & South A/c a Polling Station thenkhat leh Khawzawl leh Lengteng A/C a Polling Station thenkhatte a tlawhkual nghal a, inthlanpui neih hma November 18 vel hian lo kal leh atum thu a sawi bawk.
Expenditure Observer Pu Nitin Wapa chuan Inthlanpui Mizoram a neih turah Mizoram People's Forum leh NGO te in-pekna avangin inthlan senso chu nasa taka a kiam a beisei thu leh inthlanna felfai leh thianghlim tak neih theih a beisei thu a sawi a. District Election Expenditure Committee inthlan hmachhawn meka tih tur tul pawimawhte peihfel anih tawh thu leh mawhphurtute pualin inzirtirna pawh tum 2 neih anih tawh thu tarlan anih bakah venghimtu sipaite inkulhna hmun tur pawh ruahmanfel anih thawh thuan hrilh bawk. Pu Nitin Wapa hian ni 8 chhung Champhai District a chamchilh ang.
