India ram Independence Day vawi 73-na chu Kawnpui-ah ropui taka lawm a ni a, chawhma dar 10:00-ah VIP Pu Gaston Vanlalhriatpuia, MCS, SDO (C) Kawnpui Sub-Division hovin hnam puanzar zahna chibai buk a ni.

Zirna School 13 atangin Parade Contingent ten Hnam puanzar zahna chibai an buk a, Kawnpui Joint YMA Zaipawl ten Mizo hnam hla ‘Ro min rel sak ang che’ tih an sa bawk a ni.

Kawnpui-a Independence Day lawmna hi Pu Bruce K Vabeihrokhai,  MPS, Asst Commandant, 1st IR Bn. Mualvum chuan a kaihruai a, Khuallian Pu Gaston Vanlalhriatpuia, SDO(C) Kawnpui chuan India in zalenna a neihna kalkawng thui tak leh tawrhna nasat hnuaia Zalenna sual chhuah anih dan sawiin ram mipui ten he zalenna hi kan ngaihsan a pawimawh thu a sawi a. Mizoram Sawrkar thar in hna a thawh hrang hrang sawiin SEDP chu Huan thlai phun leh Civil Works chauh ni lo; rilru leh tumna, beihna leh theihna tihpun thleng in hma lak tur anih thu te; Thiamna tisang tur beihna leh hnathawk tura indawmchhuah kawnga kaihhruaitu pawimawh anih dan sawiin Fall Army Worm beih leta hneh anih dan te; Zirna (Education) lama Sawrkar in tan a lak dan te; mipui hnena Tui thianghlim pekna tura thil tih te a sawi a ni.

Independence Day, 2019 lawmnaah hian Swachh Bharat Mission hnuaia veng tinte Sanitation lama an inelna lawmman sem a ni a, hei bakah hian Independence Day puala Volleyball Tournament lawmman sem a ni bawk.

Pu K Lalhmachhuana, Chairman, Kawnpui Sub-Division VC Association-in lawmthu sawina a nei a, Rashtriya Salute hmangin hun tawp khar a ni.