Pu Hmingdailova Khiangte, MLA, Chairman Mizoram Youth Commission ni bawk chuan keimahni ngeiin kan thlan kan Trade theuh te tihlawhtling ngei tur hian mawhphurhna kan nei a ni a ti.

Vawiin khan Kawnpui Venglai YMA Hall-ah 3rd Phase leh 4th Phase NLUP tanpuina dawng turte hnenah 1st Installment chu Pu Hmingdailova Khiangte, MLA chuan cheng Singkhat (Rs. 10,000) theuh a sem a. NLUP tanpuina hi Agriculture Department; Horticulture Department leh Soil & Water Conservation Department hnuaia tanpuina dawng tur mi 200 hnenah a pe a ni.

Pu Hmingdailova Khiangte chuan thusawiin NLUP-a kan Trade thlan zawng zawng te hi ti hlawhtling turin taima ila, tu emaw sawipui ngai lova mahni ngeiin kan duh taka kan thlan anih avangin tihpuitlin ngei hi kan mawhphurhna a ni a ti. NLUP atana kan sum hmuh thar 2500 Core chu hman mek niin a chanve pawh kan la hmang zo lo a; kan Chief Minister zahawm tak Pu Lal Thanhawla, a sawi a piang ‘ka ti ang’ a tih ti zel mi kan nei hi kan vannei hle a ni a ti.

NLUP semah hian Agriculture Deptt. hnuaiah 3rd Phase chhungkua 77 leh 4th Phase chhungkua 45 hnenah pek an ni a, Horticulture Department hnuaiah 3rd Phase chhungkua 20 leh 4th Phase chhungkua 7 hnenah pek an ni a; Soil & Water Conservation Department hnuaiah 3rd Phase chhungkua 60 4th Phase chhungkua 21 hnenah pek an ni bawk.

NLUP semnaah hian Department hrang hrang atangin Officers ten an tawiawm a ni.

Naktuk ah Hortoki ah NLUP hi sem leh a ni ang.