Vawiin chawhnu khan Serchhip DC Meeting Room-ah Kumin Mizoram Legislative Assembly Inthlanpui lo awm tura Serchhip District chhunga Flying Squad leh Static Surveillance Team te tan Training buatsaih a ni a, he Training hi Pu Lalhmansanga, MCS, Election officer chuan kaihruaiin, Pu Lalsangliana, MCS, Addl. DC, Serchhip in zirtirna a pe a ni.

Election Officer chuan Training neih anih chhan te sawifiahin kumin Inthlanpui kan hmachhawn turah hian hun danga la awm ngai lo thil thar tam tak Election Commission of India-in a duang chhuak a, chuvang chuan bul tan tu theuh an nih avangin inthlan kaihhnawiha an chanvo leh mawhphurhna theuhte chu hrechiang a, rinawm taka an tihtur theuh te hlenchhuak thei tura inbuatsaih uluk turin Trainees te a chah a, Inthlanna dik, muanawm leh felafai a awm theih nan Flying Squad te leh Static Surveillance Team te chu an pawimawh hle dawn thu a sawi bawk.

Flying Squad leh Static Surveillance Team te hi Inthlan tur puan anih atanga hna thawk nghal tur niin, Election Commission of India in dan zawm tur a siam palzutna leh bawhchhiatna zawng zawng te an vil dawn a, Flying Squad hi Magistrate enkawlna hnuaiah awmin Videographer leh police te an tel a, an ni hian inthlanna dan bawhchhiatna chi hrang hrang inthamna te, tharumthawhna te, zu leh ruihlo, ralthuam chelekna thlengin Video evidence nen an vil dawn a, Static Surveillance Team pawhin hmun lun lai leh pawimawh zualah te, hmun ralmuanglo laiah te leh a tulna apiangah check post te siamin dan lova thil tih chi hrang hrang, election puan anih chhunga silai tawlh ruk te, zu leh ruihhlo bakah thil dang dang te an vil dawn bawk a ni.