Home Minister Pu R.Lalzirliana chuan vawiin khan Kulikawn Fire Station a hawng.

He Fire Station hawnna inkhawm Pu C.Laldina, Director, Fire & Emergency Service Department kaihhruaiah hian Home Minister chuan khawtlang hruaitute leh bialtu MLA leh khawtlang mipuite beihna leh hmalakna avanga Fire Station hawn theih a lo ni ta chu lawmawm a tih thu a sawiin, chhim tlangdung tan malsawmna a nih ngei a beisei thu a sawi. Kulikawn khawtlang hruaitute chu beidawng lova an beihna leh an teirei peihna chu fakawm a tih thu a sawi a. Home Minister chuan Mizoramin Police tha tak leh inpe tak a nei chu lawmawm a tih thu sawiin, sawrkarin an hamthatna tur a ngaihtuahsak zel ang tiin, thawhhona tha tak an nei thei chu lawmawm a tih thu a sawi bawk. Mizoram police te hmasawnna leh hna thawh that tam tak chu chhuanawm a tih thu a sawi bawk.

Bialtu MLA leh Parliamentary Secretary ni bawk Col.ZS Zuala chu Khualzahawm niin, a bial chhung chu kangmeiah vanduaina an tawh ngun thu a sawi a, Fire Station a hlat avangin duh ang a chaka thelh mih theih mai a nih thin loh avangin chhiatna nasa zawk a thlen thin thu a sawi a. Hetia chhim tlang dungah Fire Station dah a lo ni ta chu lawmawm a tih thu sawiin, Home Minister leh khawtlang hruaitute leh veng mipui te hmalakna chu fakawm a tih thu a sawi a. “Khawtlang mipuite kan thla a muang sawt a ni”, a ti.

Kulikawn Fire Station hi LAD buildingah dah hrih a ni. F&ES hi Kulikawn ah hian ram pek an ni a, sak zawh a nih velah Fire Station hi sawn a ni ang. Zanin atang duty awm tan tura tih a ni. SSO 1 in a ho ang. He station Phone No. chu 2312000 a ni.

SP F&ES Pu L.T. Mawia’n lawmthu sawiin he hun hi a khar a ni.