Pu Lal Thanhawla, Chief Minister remruatpuina leh Lunglei High Powered Committee Vice Chairman Pu Joseph Lalhimpuia hmalakna in Lunglei District in nasa zawka hma a lo sawn theih nan Vision Document 2023 changtlung tak buatsaih na tur chu chak taka kalpui mek zel a ni.

He Lunglei District Vision 2023 buatsaih dan tur chungchang hi ni 6 June khan mi sawm bik ten Pu Lalkhama, Vice Chairman State Planning Board hova zir leh sawiho a ni tawh a. Hemi tum hian hmasawnna tur pawimawh kawng hrang hrang sawiho a nih bakah chiang leh zuala lo zir turin Sectoral Working Group siam turin thu tih tluk a ni.

Tichuan , he thu bawhzui hian Pi L.Tochhong , Chief Secretary chuan order chhuahin Sectoral Working Group pathum siam fel niin Sectoral Working Group tina member tur te leh an hnathawh dan tur te chu 23 August 2013 khan tihchhuah a ni ta a ni. Sectoral Working Group te hian hun remchang hmasa berah Lunglei District ah inrawnkhawmna leh thingtlang khaw thenkhat ah zirchianna ( Field Study) nei tura hma chhawp mek a ni. He Lunglei Vision Document ah hian Lunglei District in tun atanga kum 10 lo awm leh tur chhunga hmasawnna lian tak a neih theih nan hmathlirna leh hmasawnna kawng leh rahbi tur (Roadmap to development) rawtna siam a ni ang. Heng te hi Mizoram sawrkar in Planning Commission pawmpui turin Planning Commission-ah a thlen leh dawn a ni. Sectoral Working Group hian funding window hrang hrang NEC, NLCPR, 10 % GBS, SPA atangte a sum tam zawk haichhuahna tur rawtna a siam dawn a ni.