Tuirial Constituency Bialtu MLA Pu Hmingdailova Khiangte, Parliamentary Secretary, Sports & Youth Services Department, UD&PA, etc changtu chuan ama bial chhung khuate fang mek in January 14, 2014 chawhma dar 11:00 khan Kawnpui Venglai YMA Hall-ah MLA a thlantlin a nih lawmna hun a buatsaih a.

He vantlang inkhawm a thusawitu Parliamentary Secretary Pu Hmingdailova Khiangte chuan hnathawk leh zel tura amah an duh vanga thlantlin nawn leh a ni chu ropui a tiin thinlung taka a lawm thu a sawi a. Bial chhung leh ram tan theih tawpa hnathawh a tum thu a sawi a ni. Kum 5 liamta chhung khan Mizoram ah hmasawnna tam tak hmuh tur a awm a. Infiamna khawvelah bik phei chuan India hmarchhak State dang zawng zawng te pawh in Mizoram chu an entawn ber a nih tawh a ni a ti a. Mizoram hmun kiltin a hmasawnna ruangam indin tawh zingah a bial chhunga awm Tuirial Hydel Project leh Kawnpui Hockey Khelmual changkang tak te pawh Mizoram rohlu te an nih thu a sawi a ni. Chief Minister hmalakna chaktak hnuaiah Tuirial Hydel Project phei chu peihfel tep a ni tawh a, kumin kumtawp lam hi chuan Commission hman theih tawh tura beisei a ni a ti. Ram rawngbawl tura thlan tlin a nih ang in mipuite pawh Sawrkar kut ti chak turin an hmalakna ah te thlawp tlat thin tur in a chah bawk a ni.