Vawiin khan Kawnpui Youth Association buatsaihin, Zirlai Pass tharte chawimawina hun Govt High School Kawnpui-ah neih a ni a, Parliamentary Secretary Pu H.Zothangliana’n a hmanpui.

Thu sawiin Pu H.Zothangliana chuan Zirlaite chu harsatna sutlang ngam turin a fuih a, passed ringawt hi kan ramin a that phah tlem lutuk a ni tiin thiam taka zir turin a chah a ni. Kawnpui leh a chhehvel khua ten Tuitun tui pump chhuak tura harsatna in tawh mek, kawngpui laih zauh avanga Lei vung in Tuikhuah a hnawh pawh sawrkar chuan a hria a, pawi a ti tak zet a, a ngaihthah lo a ni a ti. Sawrkar in Hortoki panna kawng 18 kms zet black top nan Special Plan Assistance atangin Nuai 346 a ruahman a. Mualkhang panna kawng 7 kms blacktop nan PMGSY sum hmangin hna thawh a ni ang a ti bawk.

Thusawitu dang Special Guest Dr. Lalchungnunga Chairman MBSE chuan tun hnaia MBSE in Entrance Test a buatsaih takah Chief Minister duh angin engkim kalpui a ni a; tun thleng hian khawi lai atang mahin sawiselna kan la dawng lo a ni a ti. He Entrance Test buatsaih anih dawn khan Chief Minister Pu Lalthanhawla chuan Entrance Test chu dik leh fel tak, sawiselna tur awm lo khawpa tha-a buatsaih turin min hrilh a, a thawktute pawh kan lawm em em a ni a ti.

Vawiina Zirlai Pass thar chawimawi tak te hi MA Passed 5; Degree Course 19; B Ed 3; HSSLC 39 leh HLSC Passed 69 an ni a, an vaiin mi 135 an ni.

He hun hi KYA President Pu H Lalfakzualan a kaihruai a. Pu EC Darduna SDO(C) Kawnpui bakah Officer te leh VCP ten an telpui a. Chawhnu lamah MGNREGS leh Banking chungchang zirhona an nei bawk a ni.