Vawiin khan Kawnpui, Bualpui leh Mualvumah Clean Committee buatsaihin Faina hnatlangpui neih a ni a. Mipuite phur takin nilengin an thawk a ni.

Zingkar ah chhungkaw hnatlang hun siam a ni a, chhungtinin mahni in leh a vel in chhung leh bungrua an tifai a. Kawnpui Town Clean Comtt. hian kum 2005 atang khan kumtin Chhungkaw Hnatlang ah hian tumah an awl ngai lo. Hetih hun chhung hian mi tumah mahni compound pawn lama chhuak vak awm lovin mitin an in tifai a ni. YMA Branch 7 te chuan veng chhung vantlang hmun pawimawh an thian fai bawk a. Dawrkai zawng zawngin an dawr hmunhma an tifai bawk a. Kawngpui kama bungraw dah te pawh an seng hawi nghal bawk.

Chhun lamah Sawrkar Office Office leh zirna School zawng zawng te chuan an mahni hmunhma theuh an tifai a. Clean Comt. chuan vawiin hian sawrkar hnathawk zawng zawng chawlh la lo tura a ngen angin hnathawktu an kal tha hle bawk. Chawhnu lamah School naupang ten vantlang kawngpui an thianfai a. National Highway 54 tui luankawr zawng zawng pawh tihfai vek a ni bawk.

Bawlhhlawh te hi 1st IR Bn. motor 2 in a paihna hmun turah an paih a. Mahse motor 2 ringawt chuan bawlhhlawh paih tur a tam avangin an indaih lo hle. Hnatlang te hi Clean Comtt. Chairman leh SDO (C) ni bawk Pu Lalchungnunga chuan zingkar atangin a vil reng a. Pu Lalchungnunga chuan mipuite chungah lawmthu sawiin hetiang hnatlangpui buatsaih hi zawngchhang tlak hle niin a sawi.

Kawnpui, Bualpui leh Mualvum ah te hian Village Level Clean Comt. dinin veng chhung thianghlimna lam kawnga hmalakna tur hian V.C. sawrkar officer leh NGO ten thawhlawm an thawh khawm thin a ni.