Bairabi - Sairang rel kawng sial mek vanga Kawnpui - Hortoki kawng fur ruahtui tlak laia zawh hleihtheih loh a awm siam dan tur chungchanga 15th September, 2016 a District Bawrhsap pisaa meeting thutlukna bawhzuina kalzelah vawiin khan District Bawrhsap Pu H.Lalengmawia hovin meeting dang neih leh a ni.

District Bawrhsap chuan meeting hnuhnung ber thutlukna ngaipawimawh a,NF Railways te leh an hnuaia contractor te hmala tha tura chahin, mipui te harsatna rilru taka hriatthiampui turin a ngen nawn a. Hmalakna tha tawk a awmlo ni a an hriat avanga Hortoki mipui ten rel kawng sialtu te hnathawk an dang ta chu pawi a tih thu sawiin, mipui te rilru thawidam turin rel kawng sialtu te chu kawng thawmthat hna nasa leh zuala thawk turin a ngen bakah, a tih theih chinah hma a lak tur thu a sawi bawk.

15th September, 2016 a thutlukna ang chuan NF Railways te hian  Kawnpui-Hortoki kawng hi fur ruahtui tlak chhungin motor te leh sumo a tlan theihna tura siam turin an contractor te an hrilhhria anga, an hna hi JAC Hortoki leh Jt.VC Kawnpui Sub-Division ten EE, PWD leh SDO(C) kaihhruaina hnuaiah an endik ang. Tunah hian NF railways hnuaia contractor pahnih Coastal leh Madhava te chuan kawng thawm that hna hi an thawk mek a ni.

Vawiin meeting-ah hian Dy.Chief Engineer, NF railways, Sr.E.E., PWD kolasib, Addl SP, SDO(C) Kawnpui, DIPRO leh Jt.VC Kawnpui Sub-Division te an tel a ni.