Ni 22 zirtawp zing Kawrthah khua Rialin a den In chhiate chu Bialtu MLA Pu Lalrinmawia Ralte, Minister Environment & Forest etc chuan a hmunah tlawhin a thlamuan.

Bialtu MLA hian Inrinni ni 23rd khan Kawrthah khua hi tlawh nghalin tumah hriat lawk loh leh tum lawk loh khuarel chhiatna kawrthah khua-in tuar a chhungkaw tam tak te mangang taka an awm chu pawi a tiin a tawrhpui takzet thu a sawi a, Rialin a den in chung chhia thlak ngai te chu a theih ang anga Sorkar lama a thawmthatna tur ngaihtuah tum a nih thu a sawi.

Kawrthah khua hian karhmasa zirtawp zinglam khan rial lian tak tak a tla a, hei hian In 382 lai tichhia in chung zingah chuan luah tlak loh khawpa den chhiat In 102 a awm a ni. Kawrthah khua rial tla hi a lian hlawm hle a, zing khawvar hnuah pawh artui tiat lai te hmuh tur a la awm a ni. He chhiatna a vang hian Kawrthah khua hi an buai hle a, Ruah a tlak deuh reng bawk avangin tawmhulna tur ngaihtuahin a theih ang angin mahni chenna In chungte hi thlak nghal a ni a, amaherawhchu Rangva leh hmanraw dangte hi Kawrthah khaw chhunga mi in a daih loh avangin khaw thenawm leh thenawm State Tripura ah te lam khawm a ngai hial a ni. Mimal In a den chhiat bakah hian Lirthei leh Sorkar Building den chhiat a nei bawk.

Nimin Inrinni khan YMA Section hrang hrangte chuan hnatlangin , heng chhiatna atana hman tur hian Bialtu MLA hian Silpouline thahnem tak a pe a, Deputy Commissioner Office Mamit atang hian In chung khuh hulna tur hian Silpouline hi pek an lo ni tawh bawk a ni.