Naupang  kawthalo  in nunna a suat hnem em avanga Kawthalo Do Beihpui  chu India  ram pumah kum 2014  atang khan   kum tin  lo kalpui thin a ni tawh a. Kumin 2017  ah pawh  chhunzawm  leh a niin  12^th – 24^th June, 2017 chhung hian hman tur a ni. Health Minister Pu Lal Thanzara chuan vawiin  khan  Paediatric OPD, Civil Hospital-ah  “Naupang Kawthalo vanga Naupang thihna tihbo” programme  Launching of Intensified Diarrhoea Control Fortnight (IDCF) 2017  chu a hawng.

National Health Mission thil tum lian ber pakhat chu naupang thihna tih tlem a niin  India ram chhungah kum tina nausen leh naupang nunna  hlu tak suat thintu  zaa sawm (10 %) hi kawthalo a ni a. Kawthalo hi natna tlanglawn leh huatthlala tak, hote a lang si mahse enkawl that loh chuan thihna  hial thlen thei a nih avangin  ngaihthah mai tur a nih loh thu leh  a tir atanga uluk taka enkawl ngai a nih thu Pu Lal Thanzara chuan sawiin  he IDCF kawthalo beihpui thlak a nih chhung hian ASHA ten  mahni huam chhunga naupang kum nga chin hnuai lam tlawh chhuak a ORS  te semin, kawthalo ven dan leh enkawl dan tur  leh ORS  siam dan tur  an zirtir tur thu a sawi a. Sawrkar Damdawi In leh Sub centre te, Anganwadi Centre ah te ORS Zinc Corner te  siam a ni a, heng corner ah te hian kawthalo leh kawthalo in a thlen taksa tui tlakchhamna te enkawl theih an nih tur thu a sawi bawk.

Kawthalo enkawlna tha ber chu ORS leh Zinc a niin  uar  zawka  hmangin  tan lak a pawimawh thu  Health Minister chuan sawiin  hriselna lama thawktu te bakah mitin  mimal  leh a khawtlang ang pawn  kawthalo avanga thihna te, a venna leh enkawl kawngah  nasa lehzuala thawhho  a pawimawh thu leh hriatna  leh thiamna te midangte tana tangkai taka hman  chuan  vantlang  hriselna  in hma a sawn anga, chu chuan ram pum huapin rah tha a chhuahpui ngei a beisei thu a sawi a. Faina  ngai pawimawh tur leh  mahni in vawngfai in, hmun kilkhawr zawk leh Ekin te vawng fai in, tui thianghlim  chauh in thin  tur leh kut silfai  tha tur in mitin te a chah a, ORS  sem chhuah tur te chu a tlangzarh nghal a ni.

Dr Lalrozama, IAS, Mission Director, National Health Mission, vawiin  IDCF 2017 programme hawnna kaihruaitu chuan  he programme hi mi tin huap a niin  naupang kawthalo hi ralpui beih anga do tham a nih thu a sawi a.  Dr Lalchhuankimi HOD, Paediatric Department, Civil Hospital, Aizawl chuan  “Diarrhoea and its management and prevention’ chungchang a sawifiah a, kut silfai dan tur te a taka entirin  nu leh naupang  leh kalkhawm te chu a zirtir nghal a ni.