Vawiin khan Health Minister Pu Lal Thanzara chuan Aijal Club-ah kar hnih chhung awh tur Intensified Diarrhoea Control Fortnight (ICDF) chu Aijal Club ah a hawng.

Pu Lal Thanzara chuan kawthalo natna umbo beihpui thlakna hun  hman mekah vantlang hriselna kawnga thawktu Health Worker, ASHA, Village Health Sanitation & Nutrition Committee te, Zirna ina thawktu, Anganwadi Worker bakah vantlang mipuite hian kawthalo vanga naupang thihna sukiang turin mawhphurhna sang tak an nei tih hre thar turin a chah a. Mahni mawhphurhna zawn theuhah theihtawp chhuah turin a sawm a ni. Kawthalo chu natna tlanglawn leh huatthlala, naupang nunna za zela 11 lai latu a ni a, thawktute leh mipui ten he natna laka inven dan leh enkawlna kawngah hriatna  tih puna, nasa lehzuala thawhho a pawimawh tak zet a ni, Health Minister chuan a ti.

AMC Chairman Pu CT Zakhuma pawhin thu sawiin thawktuten mipui hriselna tura tan an lak nasatzia a fak a, mi nunna chhanhim turin an thawkrim a, vei tak te in an vei a, an ti mai mai lo tih a lang a ni, a ti. Mipuite hriselna tur hian Health Department a thawktute chauh an pawimawh lova, mipui mimir hian mawhphurhna kan nei theuh tih hriaa tan la turin mipuite a chah a ni.

ICDF hi India ram pumah kum 2014 khan hman tan a ni a. Naupang kum 5 hnuai lam target niin kawthalo vanga thi an tlem theih nan beihpui thlak a ni. India ramah chuan naupang kum 5 hnuai lam thihna tam ber hi kawthalo (diarrhoea) a ni a, he natna avang hian ram pumah kum khat chhungin naupang kum 5 hnuai lam nuai 1.4 vel an thi ziah a, Mizoramah chuan kum 2014-15 chhung khan kawthalo avangin naupang 17 an thi a ni. Kawthalo hi a hun taka enkawla, pek tur dik pek chuan awlsam taka tihdam theih a ni a. Chuvangin he hmalakna hi IMR, MMR, Malnutrition, TFR ti hniam tura hmalakna pawimawhber te zing a mi a ni.

ICDF hi August ni 8 thleng hman a ni dawn a. A kar khatnaah Diarrhoeal control lam hawi inzirtirna an kalpui ang a. Hapta khatna chhung hian ASHA leh Health Worker ten mahni huam chhungah kum nga chin hnuai lam awmna chhung tin te tlawh chhuakin  ORS an sem ang a; Zinc Corner te siam a ni bawk ang. Hei bakah hian ORS siam dan hrilhhriat te, naupawm te hnena zirtirna pek bakah kut silfai pawimawhna hrilhhriat kawngah theih tawp an chhuah dawn a ni. A kar hnihnaah Infant and Young Child Feeding (thianghlim leh hrisel taka naupang ei leh in pek dan) inzirtna lam an hawi ve thung ang a. Health Worker leh ASHA ten nau pawmte tlawh chhuakin an hnenah hian nau hnute tui pek that pawimawhna te, Nutrition pawimawhna te hrilhin naupang hriselna te an endik sak anga, a tul anga mithiam rawn zui kawngah thurawn an pe bawk ang.

ICDF hawnna inkhawm hi Health Department Principal Director Dr.K.Ropari’n a kaihruai a. NHM Director Dr. Lalbiakzuala’n ICDF nihphung tlangpui a sawifiah a. RCH State Programme Officer Dr.R.Lalthanga, Dr Lalmalsawmi Hmar, DrCatherine Ngurbiakveli, School Education Jt Director Pu K.Lalrintluanga, Social Welfare State Nutrition Officer Pi Zonunpari bakah PHE (CCDU) Director Pu Lalrothanga te’n thu an sawi a. Health Services Director  Dr.Rohmingthanga Ralte chuan lawmthu sawiin hun hnung a khar a ni.