Sorkar laipuiin rampum hriselna leh faina kawnga hmalakna pawimawh tak ‘Swacch Bharat Mission’ a kalpui mek chu kar hmasa ni 24.7.2015 (zirtawpni) khan Lunglei-ah pawh a bultanna inkhawm neih a ni a. He ‘Swacch Bharat(Urban) Kick-Off’ Saikuti Hall, Lunglei-ah neihah hian Lunglei Addl. DC Pu H.Lianzela chu Khuallian niin UD&PA Department chuan Clean Lunglei Volunteers-te nen tangkawpin ‘Kick-Off’ hi an huaihawt a ni.

Swacch Bharat(Urban) Kick-Off inkhawm Lunglei District & Urban Development Officer Pu Albert Vanlalliantluanga kaihhruaiah Addl DC Pu H.Lianzela chuan Swacch Bharat thiltumte tihlawhtling tur chuan a tifaitu kan ni thei lo a nih pawhin a tibawlhhlawhtu ni lo tal turin mitin a sawm a, khawtlang hruaitute leh mipui vantlang hrim hrim pawh faina leh hriselna kawnga hmasawn zel turin inzirtir ang u, a ti. Vantlang nun fai leh thianghlim zawk kan neih theih nan inthiarna hmunhma thianghlim zawk nei turin tanlak a ni dawn a, vantlang enkawl inthiarna hmunhma tihchangtlun leh enkawl hna hi mitin te mawhphurhna a ni a; ram leh nunghchate tana him, man to si lo leh tunlai thiamna hrang hrang hmanga nunphung changkang leh fai zawk nei tura midangte fuih kaltu-a tan tum theuh turin mipuite a sawm a ni.

Lunglei DUDO Pu Albert Vanlalliantuanga pawhin thusawiin Swacch Bharat Mission(Urban) chu Ministry of Urban Development hnuaia hmalakna a ni a, Mizoram State chhunga khawpui 23 a tuam chhuak ang a, heng khaw hrang hrang zingah Lunglei chu Campaign hmalakna hmasa ber a nih avangin state pum tan kick-off-na tur a ni, a ti. Swacch Bharat Mission hi thlur hnihin kalpui mek a ni a, thingtlang lamah SBM(Gramin) chu PHE Department-in an enkawl laiin khawpui(Urban) huamchhungah chuan UD&PA Department-in a enkawl thung a. He hmalakna hi India Hnam Pa Mahatma Gandhi piancham 150-na 2nd October 2019 thleng kalpui a nih tur thu a sawi bawk.

Swacch Bharat Mission(Urban) hnuaia hmalak tumdan tlangpui chu hetiang hi a ni:

1. Chhungtin Ek In thianghlim leh tha neih tir theuh tura hmalak - Hemi atan hian household survey neih a ni tawh a, Aizawl-ah compiled mek niin, hmalak vat beisei a ni.

2. Vantlang inthiarna mumal, tha leh thianghlim zawk sak.

3. Bawlhhlawh felfai zawk leh thianghlim zawka sawngbawlna tura hmalak - Hemi aan hian UD&PA Department chuan hma la tan tawhin, a hmunhma tur pawh tihfel a ni a, DC lam hotute nena a hmunah enhovin DPR pawh peihfel mek a ni.

4. Mipui/mitin faina leh Ek In thianghlim neih kawnga hma la tura inzirtirna leh infuihna (awareness campaign) neih tum a ni bawk.