National Health Mission hnuaia rampum huapa hmalakna pakhat ‘Intensive Diarrhoea Control Fortnight(IDCF)’ chu Lunglei District chhungah a bultan nan vawiin khan Lunglei DC Pu Ashish Madhaorao More chuan Doctors’ Conference Hall, Lunglei Civil Hospital-ah a hawng.

IDCF hawnna inkhawm Lunglei CMO Dr.VLMS Dawngliana kaihhruaiah Khuallian Pu Ashish More chuan diarrhoea(santen) chu natna tihdam awlsam tak ni mahse a rei chuan thihna pawh thlen theih a ni a; thingtlang leh khaw kilkhawr zawkah chuan diarrhoea vangin nausen/naupang thi an la tam em em a, hei hi a chhan ber chu inkalpawhna a that loh vang te, damdawi in leh inenkawlna that lo vang te bakah hemi kawnga inzirtirna leh inhrilhhriatna a la tam tawk lo vang te a ni, a ti a. IDCF kalpui a nih tan hma pawhin Lunglei CMO leh Health Department hnathawkten harsatna hrang hrang karah District pumah mipuite hriselna a that zawk theih nen theihtawp an chhuah reng a, tunah IDCF hnuaia a aia ngawrhin diarrhoea tihrem nana hmalak theih a nih dawn ta chu a lawmawm hle a ni, a ti bawk. Fur laiin kawthalo leh santen a hluar zual thin a, chuvangin tuna IDCF kalpui tur hi a hun tak a ni tiin Pu Ashish More chuan santen leh natna dang pumpelh tur chuan faina leh thianghlimna kan ngaih pawimawh a tul hmasa ber a ni, a ti. Lunglei District chhungah he Fortnight chhungin kawthalo/santen vanga thi kum 5 hnuai lam nausen/naupang tumah thi an awm loh nan health Deaprtment chauh ni lovin mipui zawng zawngte kan tanrual thia a ngai a, a enkawl dan dik leh tha hrelote hnenah a zau thei ang berin kan hrilh zel tur a ni tiin kalkhawmte a chah.

Lunglei CMO Dr.VLMS Dawngliana chuan kuminah Mizoram District-te zingah Lunglei District-ah nausen/naupang thihna a tlem ber a, Health Department hmalakna hrang hrangah Lunglei DC Pu Ashish More chuan theihtawp a chhuahpui thin avang leh Department hnathawkte thanhnemngaihna avangin a ni tiin lawmthu a sawi a. Sorkar Laipui programme pawimawh tak dang pakhat ‘Swacch Bharat’ thiltum leh IDCF thiltum te chu inzulzuiin, mipuite chu faina leh hriselna kawnga hmasawn dan tur chungchang inhrilhhriatna tura duan an ni a, heng sorkar hmalaknate hlawhtling tur chuan mitinte kan pawimawh theuh a ni, a ti.

Vawiin IDCF hawnna inkhawmah hian Dr.Lalparliani, SMO/Nodal Officer(IDCF), Lunglei chuan IDCF thiltum leh kalpui a nihdan tur chungchang a sawifiah a; Dr.Lalhmunsiami, (Family Medicine), Lunglei Civil Hospital chuan Diarrhoea leh a enkawl dan a sawi bawk. Nausen/naupang kawthalo/santen veite thihna chhan lian ber chu an taksaah tui an tlachham(dehydration) vang a ni a, hemi atan hian ORS pek that a pawimawh em em a ni tih sawiin Doctor-te chuan inah ORS awlsam taka siamdan chu tui litre 1-ah thirfiante 1 chi leh thirfiante 8 chini chawhpawlha naupang chu a dam that hma chu pek ngat ngat tur a ni tih an sawi a. Kawthalo/santen hi chi 2-ah an then a - 'Acute Diarrhoea' chu darkar engemawzat atangin ni engemawzat emaw a daih tlangpui a, enkawl that chuan an dam hma a; 'Chronic Diarrhoea' erawh ni 14 atanga thla engemawzat a daih thei a, hei hi naupangin TB/HIV/tropical sprue an vei vang emaw malnutrinution vang a ni tlangpui a ni tih an sawi bawk.

‘Intensive Diarrhoea Control Fortnight’ hi nikum 2014 atang khan ramchhung hmun hrang hrangah kalpui tan a ni tawh a, a thupui ber chu ‘Zero Childhood Deaths due to Diarrhoea’ tih a ni. He Fortnight chhung hian kum 5 hnuai lam nausen/naupang diarrhoea nei enkawl/tihdam nan ORS leh Zinc tablets bakah nau hnute pek dan dik inzirtirna pek vek tur a ni. India ramah kum 5 hnuai lam nausen/naupang thi za zela 10.4% chu kawthalo/santen vang a ni a; kumtin nausen/naupang nuai 1.4 te chu kawthalo/santen vangin an thia chhut a ni bawk. IDCF hnuaiah hian thlur hnihin beihpui thlak a ni dawn a :

1). A hmasa zawkah chuan 27th July-1st August 2015 chhung hian nausen/naupang kum 5 hnuai lam awmna chhungkaw tinte hnenah ASHA Voluteers-te leng lutin ORS Package an pe vek ang a, diarrhoea chungchangah zirtirna (counselling) an pe nghal bawk ang. Health Centre/Damdawi In awmna apiangah ‘ORS-Zinc Corners’ an din vek ang a, nausen/naupang kawthalo veite hnenah heng hi pek ngei ngei tur a ni. Hemi kar khat chhunga an hmalakna leh hlawhtlinna Report chu ASHA Volunteer-te chuan an bial chhunga Health Centre theuhah an thehlut dawn a ni.

2). A thawh hnihnaah chuan 3rd-8th August 2015 chhungin ‘Infant & Young Child Feeding Week’ hman a ni ang a; ASHA Volunteers te chuan in tinah lutin naupang ei tur hmu tha tawk lo(malnourished children) an chhinchhiah vek ang. Khawtinah khawtlang hruaitute nen nu zawng zawng kokhawmin ‘Mothers’ Meeting’ huaihawtin naute hnute pek dan dik te, nausen/naupang kawthalo enkawl dan te, tui thianghlim chauh in/hman tur te bakah kut leh taksa silfai ngun pawimawhna te an hrilh dawn a ni. Nausen/naupang na zual tawhte chu doctor leh medical mithiam zawkte hnenah an refer dawn bawk a ni.