Nimin chawhma dar 10 khan DC Conference Hall, Keifangtlangah Kawthalo dona hapta, Intensified Diarrhoea Control Fortnight (IDCF) hmandan tur ngaihtuahin meeting neih a ni a. Meeting hi Champhai District Bawrhsap Pu Vanlalngaihsaka, IAS, District IDCF Steering Committee Chairman ni bawkin a kaihruai a, Member-te an tel tha hle.
Meeting-ah hian Champhai District CMO Dr. C. Zirliana chuan IDCF-in a tum ber chu kawthalo avanga naupang thihna umbo te, naupang kawthalo tana ORS leh zinc tangkaina inzirtir leh naupang kum nga hnuai lam kawthalo laka ven dan leh a enkawl dan inzirtirte a ni tih sawiin kawthalo dona hapta hi July ni 11 – 23 2016 chhunga hman tur a nih thu a tarlang a.
IDCF Steering Committee meeting chuan IDCF hawnna hi July ni 11, 2016-ah Champhai District Hospital-a neih turin a ruahman a, a hawng turin CMO ruat nghal a ni. Champhai Distric IDCF Nodal Officer atan Dr. R. Lianmawia, SMO chu ruat a ni bawk. July ni 7, 2016 hian PHC hrang hranga Medical Officer zawng zawngte ko khawmin hemi chungchanga hmalakna tur chipchiar inzirtirna neih a ni bawk ang. PHC zawng zawnga MO tinte chu an mahni area chhung theuhah ORS leh Zinc Corner tur ruat tura thuneihna pek niin Anganwadi 10 thlan bik turte erawh chu CDPO kutah dah a ni thung
He Kawthalo dona hapta chhung hian ASHA-te chuan an bial chhunga naupang kum 5 hnuai lam zawng zawngte tlawhchhuakin ORS an sem ang a, Primary leh Middle school naupangte hnenah kut silfai pawimawhna zirtirnan hemi hun chhung hian nitin hun hman tura ruahman a ni bawk.
