Vawiin hian Pu Lalthanzara, Minister, Information and Public Relations Department chuan Kanghmun South Branch MHIP ten Mizoram Hmeichhe Insuihkhawm Pawl Day vawi 42 na Kanghmun South Community Hall-a an lawmnaah khuallian niin a hman pui a, chanchintha chhawm tel tlawmngaipawlte hnenah sawrkar aiawhin lawmthu a sawi.

MHIP Day hmanna inkhawmah Pu Lalthanzara chuan, Kanghmun leh a chhehvel chu bialtu MLA fel leh zuanzang takin a enkawl avangin an vannei hle tih a sawi a, hmasawnna hna pawh a thawk nasa hlea a hriat thu a sawi. Kan ram vanneihna em em chu Chanchinthain a rawn chhawm tel tlawmngaipawl chak leh ropui tak tak kan nei hi a ni a, heng tlawmngaipawlte hian sawrkar hmalakna hrang hrangah min thawhpui thain kan ram hian an zar kan zo nasa tak zet a ni, vawiin MHIP Day vawi 42 naah hian kan rama tlawmngaipawl zawng zawngte hnenah sawrkar aiawhin lawmthu ka sawi a ni, a ti. Minister chuan, kan ramah hmeichhiate tan hmakhaw eng tak a awm thu sawiin sawrkarah, VC atanga MLA thlengin hmeichhiate tan hmunawl a awm tam tial tial a, sawrkar hian a ngaihthah ngailo che u ani, a ti a. Chhungkua leh khawtlang tha din kawngah pawh pate aiin nuten kan fate kan hruai dik sam zawk a ni, a ti bawk.

Hriselna kawnga hmalakna tur tam tak kan ramin a neih thu sawiin HIV leh AIDS te chuan kan ramah nasa takin bu an khuara, zuk leh hmuam avanga natna tam takten min run mek bawk a, heng thil kan ram leh hnam hmelmate dova, fate atanga a thatloh zia zirtira theihtawp chhuah reng turin ka sawm che u a, mahni chhungkua theuh Mission Field a ngaia fa tha, ram tana chhenfakawm hrin tum theuh turin a ngen ani. Minister hian sawrkarin hriselna lama hmalakna hrang hrang a neih mekte a tarlang bawk.

Minister hian MUP te tan Tuilum Ip 10 leh Tarpauline, MHIP tan Tarpauline leh PA Set, VC tan Silpauline, YMA hnenah YMA Colour Silpauline leh Tawngtaina In an sakna tur tanpuina pawisa fai a pe a, Games & Sport hnenah Football 3 leh Volleyball 2 a pe ani. Kanghmung South Branch MHIP hian Minister hi Puan Ropui an lo pein, Branch YMA chuan Tawlhloh Puan an pe ve bawk a ni.

Kanghmun South MHIP Day lawmna inkhawm hi Branch President Pi B. Rozami'n a kaihruai a, Secretary report-a a lan dan chuan an khuaah hian MHIP member 167 an awm mek a ni. Tin he inkhawmah hian MHIP Sub Headquarters, Serchhip atanga hmanpuitute, an khawtlanga tlawmngaipawl hrang hrang aiawh leh VC ten thusawina an nei hlawm a, an member Day leh Day inkara boralta mi pathumte sun nan Pi Lalengliani chuan sunna hla sain, a zai chhung hian kalkawm zawng zawngte an thut hmunah an ding vek a ni. Tin, an member kum 70 tling chin mi 8 te hnenah thilpek an hlan bawk ani. Chawhma lama Hall-a hun an hman zawh hian Field ah intihhlimna chi hrang hrang an nei leh bawk a ni.

Kanghmun South khua hi Lunglei District chhung hmar lam khaw tawntirh ber, Thenzawl kiang maia awm niin in 130 vel awmna leh mihring 500 vel chen mekna khua a ni.