Vawiin khan Chief Minister Pu Lal Thanhawla chuan Serchhip Town area chhunga Mizo Hmeichhe Insuihkhawm Pawl (MHIP) Branch hrang hrang ten a huhova MHIP Day vawi 42-na lawmna New Serchhip YMA Hall a an buatsaih chu 'Day Pa' niin a hmanpui.

Chief Minister Pu Lal Thanhawla chuan nuho te pawimawhna sawiin nu ten chhungkaw nun an kaihhruai that chuan khawtlang nun a tha a, chu chuan Kohhran nun a tichakin kawng tinrengin hma kan sawn thei a, siam thatu pawimawh berte zing a mi in ni a tiin, kawng engkimah an fate leh khawtlang tan malsawmnna ni chunga entawntlak ni theuh turin he hunah nuho kalkhawmte chu a chah a. Mizoram hmasawnna kawng hrang hranga tlawmngai pawl te inpekna leh hnathawh leh Kohhran te uapna chu fakin Kohhran leh tlawmngai pawl ten a chhe lai siamthat kawngah Sawrkar tha kan tih chak a pheikhai rual taka ke kan pen chuan Zoram siamthatna kawngah nasa takin hma kan sawn thei dawn a ni,  a ti.

Chief Minister chuan Mizote hi za a za Ringtu ni chungin vaihlo hman, zuk leh hmuam, cancer natna leh HIV/AIDS lamah kan dinhmun sang lutuk hi Ringtu dinhmun atang chuan a chhuanawm lo hle a, heng thil -  min ti hrisel lotu, kan nun titawitu leh mi tirethei tute thunun a, Mizo Kristian nun atanga heng thil thalo te umbo a nih theih nan nuho te hian a bik takin in theihna apiangah engtin nge hma ka lak ve theih ang tih ngaihtuah chungin theitawp chhuaha hma kan lak tlan a pawimawh a ni, a ti a. Mizoram pumah MHIP member te chu MHIP Day chibai bukin duhsakna a hlan bawk a ni.

He hun hmanpuitu dang Pi Lal Riliani, President, Indian Society on Tobacco & Health (Mizoram Chapter) chuan Mizo hmeichhe hmathlir thui tak nei ten kum 40 hma lamah MHIP an lo din a, bul min tansaktu te kha an ropui a, an inpekna leh hmeichhiate leh khawtlang tana kawng hrang hranga an hnatawh leh an rawngbawlna te kan hre chauh dawn a ni tiin MHIP chu pawl zahawm leh tangkai anih reng theih nan member tin ten mawhphurna kan nei theuh a ni, a ti a. Member te kan inlungruala, kan tan rual chuan pawl hi a chak a, pawl hi a thianghlim bawk thin a ni, a ti bawk. Vaihlo hman leh zuk leh hmuama Mizoram dinhmun chungchang sawiin nuhote hian theihtawp chhuaha heng thil tha lo hi kan do chhunzawm zel chuan nasa takin hma kan sawn zel ang tih ka reng a ni, a ti a. Mizo nun timawia, chawi sanga, Mizo incheina chawikan kawnga an theihna apainga theihtawp chhuah zel turin he hunah kalkhawmte chu a chah bawk a ni.

Serchhip Town MHIP Branch hrang hrang tanghote hian Pi Lal Riliani hnenah zuk leh hmuam dona kawnga a inpekna leh a hnathawh leh Mizo incheina chawikan kawnga a hnathawh te fakin a hnenah chawimawina thuziak an hlan a ni.  

MHIP Day vawi 42-na lawmna hi Pi Sanghmingliani, President, MHIP IOC Branch chuan kaihruaiin Pi Angela Sailo, President, MHIP P&E Branch chuan inhmelhriattirna hun a hmang a. Dr. Zohmingsanga, District Consultant, National Programme on Tobacco Control chuan zuk leh hmuam that lohzia sawiin Anti Tobacco Awareness chu presentation hmangin kalkhawmte a hrilh hria a ni.