Vawiin chawhnu dar 1:00 khan Lunglei High Powered Committee (HPC) Vice Chairman Pu S. Laldingliana chuan a bial Tawipui North-I ah Community Hall sak thar a hawng a, MHIP Day lawmnaah Khuallian niin a hmanpui nghal.
Pu S. Laldingliana chuan khua mite chu neitu rilru pu a uluk taka enkawl chhunzawm turin a chah a. Khawtlangah thawhhona tha a awm chuan hmasawnna mipui zawng zawng hnenah a thleng thei a chuvangin khawtlang siam tha tur chuan mitin kan pawimawh a ni, a ti. Community Hall thar lawmpui nan badminton leh table-tennis infiamna hmanruate a hlan nghal a ni.
MHIP Day lawmnaah hian Tawipui North-I branch-te chuan MHIP member kum 70 tlingte hnenah lawmpuina thilpek an hlan a. In leh a chhehvel vawngfai thlan chhuahte hnenah lawmman an sem nghal a ni.
MHIP Day lawmna hi VCP Pu T. Biaksailova’n a kaihruai a, SEMS zirlai naupangten Cheraw entirin, MUP leh YMA aiawh atangten thusawi ngaihthlak tel a ni. Tawipui North-I khua thenawm VC member-ten an tawiawm tha hle bawk a ni.
