Swachh Bharat hnuaia state pum huap hospital fai inelna Kayakalp 2016-ah Kolasib District Hospital-in lawmman pathumna a lak chu vawiin khan District Medical Superintendent(DMS) Conference Hall-ah a lawmna neih a ni a, District Bawrhsap Pu H.Lalengmawia'n a hmanpui.
Khuallian Pu H.Lalengmawia chuan hmasawn zel tumna rilru hi a pawimawh a ni tiin, Kayakalp inelna lo awm zel turah Kolasib District Hospital chu Mizoram a Damdawiin fai ber a nih ngei theih nan lungrual taka hmalak chhoh a ngai a ni a ti a. Damdawiin hnathawktu te mai bakah khawtlang mipuite nen tanho a pawimawh thu sawiin, puih an ngaihna ah district thuneitute leh department dang te pawh pun thin turin a chah a ni.
Kolasib District Hospital hi kum 1896-ah din a ni a, tun dinhmunah khum 60 awmin thawktu mi 80 chuang hretah Doctor 12 an awm a. Kayakalp 2016 atan hian damdawiin hnathawktu te hi khawtlang mipuite leh zirlai ten hnatlangin an puih thin bakah District Bawrhsap hmalaknain sorkar department dangte pawn an pui thin bawk. Lawmman pathumna hian Rs.3lacs a keng tel a ni.
Lawmna inkhawm hi Dr.James R.E.Mawia, DMS in kaihruaiin, Dr.C.Vanlalhlimpuia'n Kayakalp 2016 inelna atana hmalak dan leh tehfung hrang hrang te kalkhawmte a hrilh a. He hunah hian Dr.K.Ropari, Principal Director, Health & Family Welfare Department pawhin thu sawiin, Kolasib District Hosptial in lawmman an lak a lawmpui thu leh kuminah chuan lawmman pakhatna la thei turin duhsakna a hlan a ni.
