Vawiin khan Directorate of Science & Technology Conference Room-ah Mizoram Remote Sensing Application Centre (MIRSAC) buatsaihin vansang lam thiamna hmanga Mizoram khawpui lian leh mihring tamna hmuna khuarel chhiatnain mipui a nghawng theih dan leh chumi laka inven dan tur chungchanga zirchianna leh sawihona hun hman a ni.
He Workshop hi Dr RK. Lallianthanga, Chief Scientific Officer leh Member Secretary, MIRSAC-in a kaihruai a. Dr RK. Lallianthanga chuan thuhma sawiin he hun buatsaih a nih chhan tlangpui a sawi a. MIRSAC hian NEC leh Mizoram sorkar bultumin Mizorama khawpui lian zual deuh deuh, district headquarters pariata khuarel chhiatna hrang hrangte – lirnghing, leimin, thli leh ruah thleng thei bakah heng chhiatna-in mipui a nghawng theih dan leh inven dan tur te tunhma a an lo zir tawh aia chipchiar zawka zirchiang tura hma lak a nih mek thu a sawi a. He zirchianna hi zawh a nih hnuah hemi lama hmalatu sorkar department hrang hrangte tan thutlukna siam kawngah leh hmalakna kawngah a tangkai hle dawn a ni, a ti. Hemi kawnga hmalatu sorkar department hrang hrang aiawh lo kalte chu rawtna leh thurawn tangkai tak te pe turin a sawm bawk a ni.
Pu ZD. Laltanpuia, Scientist, MIRSAC chuan hemi kawnga hmalak dan tur tlangpui a lem nena entirin a sawifiah a. Mizoram district hrang hrang khawpui liana mihring cheng zat te, tar leh naupang awm zat te, eizawnna hrang hrang thawk zat te, ziak leh chhiar thiam awm zat te, BPL awm zat bakah in leh lo din dan te zirchian a, chuta tanga chhiatna lo thleng thei nen khaikhin a, Hmun hlauhthawnawm bik (vulnerable and risk areas) te zawnchhuah leh inven dan tur duanchhuah chu an tum ber pakhat a nih thu a sawi. Hei bakah hian chhiatrupna lian tham lo thlen laia awlsam lehzuala chhanchhuahna hna thawh dan tur chungchang te a lem nena entirin a sawifiah bawk.
He Workshop-ah hian sorkar department hrang hrang aiawh - Deputy Commissioner, Aizawl, P.H.E., P.W.D, P & E, D.M. & R, A.T.I ., G.M & R leh Geological Society of Mizoram atanga lo kalkhawmte chuan rawtna leh thurawn tangkai tak tak te an sawi a ni. He hun hi Dr Lalnunsiama Colney, Principal Scientist, MIRSAC chuan lawmthu sawiin a khar a ni.
