Vawiin khan Mizoram State Chief Information Commissioner Pu Lalduhthlana Ralte, IFS (Rtd.) chuan Aijal Club-ah “Tuihna, KC Lalvunga atanga lo put” tih lehkhabu, Dr.Rosy Lalmalsawmi Khuma ziak a tlangzarh.

Pu Duhthlana chuan Mizo zinga India ram palai ni thei hmasa ber Pu KC Lalvunga chanchin ziakna lehkhabu tha tak, Mizo mipuite chhiar theih tura phochhuah a lo ni ta chu lawmawm a ti a. Thu ngaihnawm, belhchian dawl leh hriatthiam awl tak niin Mizo thalaite tana chona leh fuihna nasa tak nia a hriat thu a sawi a. Suangtuahna mitthlaa an lo hmuh thin, titia riral leh mai thin chu nakin thlenga thangtharte chhiar theih tura ziaka dah a ni chu lawmawm tiin a ziaktu fakawm a tih thu Chief Information Commissioner chuan a sawi bawk.

Lehkhabu tlangzarh inkhawm tawi buatsaihah hian lehkhabu ziaktu Dr.Rosy Lalmalsawmi Khuma, Pu KC Lalvunga nupui Pi Dari, Pu Andrew Lalherliana, Pu Lalrammawia Ngente leh Mizo Academy of Letters aiawh ten thu an sawi a ni.