Vawiin khan Serchhip District Election Officer Pi. Sangchhin Chinzah, District Bawrhsap ni bawk chuan Serchhip District Electoral Roll Special Summary Revision, 2018 Final chu a chamber ah a tlangzarh a. A copy hi tlawmngaipawl leh Political Party te hnenah a hlan nghal.

Pi Sangchhin Chinzah chuan, Election Office lam ten theihtawp chhuaha an beihna zarah felfai takin Summary Revision, 2018 kalpui niin a hun takah tlangzarh theih a ni a, a lawmawm tak zek a ni, a ti a. Summary Revision fel fai tak kalpui a nih theih nana Election Department thawhpuitu tlawmngaipawl, khawtlang hruaitu leh Booth Level Officer zawng zawngte chungah lawm thu a sawi in, Political Party te pawh theihtawp an chhuahnaah lawmthu a hrilh a, inthlan te pawh kan hmachhawn leh mai dawn avangin dan hnuaiah engkim tia thawhpuiah a sawm nghal a ni.

Roll –a a lan danin Serchhip District a Assembly Constituency pathum zingah 26-Serchhip (ST) A.C ah voters tam berin mi 17678 an awm a, an zinga mi 9268 hi hmeichhia niin mipa 8410 an awm a. 27- Tuikum (ST) A.C ah hian voters 15447 awmin an zinga mi 7691 hi mipa an ni a, mi 7756 chu hmeichhia an ni thung. 28-Hrangturzo (ST) A.C ah hian voters 15555 an awm thunga, an zinga mi 7750 hi mipa niin a dang 7805 chu hmeichhia an ni. Service voters hi 26- Serchhip in mi 79, 27-Tuikum in mi 66 leh 28-Hrangturzo in mi 56 an nei a, Service voters te hi mipa vek an ni. Tichuan, Serchhip District puma voters awm zat chu 48881 niin an zinga 24052 chu mipa an ni a, hmeichhia 24829 an awm thung a ni.

Nikum, 2017 Roll aia kumin Roll thara voters an pun chhoh dan chu; 26- Serchhip ah mi 420, 27- Tuikum ah mi 296 leh 28- Hrangturzo ah mi 265 niin an vaiin District pumah mi 981 an ni a, nikum aia kumina voters tam zawkna hi 2.06% a ni. Electoral Photo ID hi voters zawng zawngte hnenah pek vek niin, Elector-Population Ratio (EP Ratio) tlin zat chu 60% a ni bawk.

He tlangzarhna hunah hian Election Officer Pu Abraham B. Khithey, MCS chuan report tlangpui hi a pe a. Population Census 2011 ah District Gender Ratio in 1000:982 a nih laiin Electoral Roll ah 1000:1040 a nih thu tarlangin, hetianga Roll a hmeichhe voters tam zawk chhan ber chu Census chuan District pum a tuam laiin, Election ah hian District Area ang thlapa bial a inthen loh deuh vang a nih thu te, pem kual vang te leh thil dang dang vang a nih thute a sawi a ni.

Vawiina Roll tlangzarhna ah hian Party aiawhte,tlawmgaipawl aiawhte leh chanchinbumite an tel a ni.