3024/2022-2023

Champhai, the 13th December, 2022: Champhai khawpui kianga luang Keilungliah lui khuah mek, peihfela hawn anih hnua a enkawl zui zel kawnga hmalatu tura Sawrkarin a din, 'District Level Committee on Post Completion Management & Maintenance of Dam Reservoir cum Recreation Centre at Keilungliah' chu nimin tlai khan an Chairman, Pu James Lalrinchhana, District Bawrhsap hovin tuikhuah kamah an thukhawm.

Chairman Pu James Lalrinchhana chuan Keilungliah tuikhuah chu Champhai nghahfak leh rohlu tak ni mahse dan leh thupekte zawm chung zela tangkai taka hman thiam a pawimawh thu a sawi a. Tunhnaia Keilungliah tuikhuaha chetsualna thleng chu pawi a tih thu leh vanduaina tawk a tawrhpui thu sawiin, a buaipui kawnga YMA leh tlawmngaia thawkchhuak zawng zawngte fakawm a tih thu a sawi a. Keilungliah tuikhuah enkawl kawngah infinchhuah zel a pawimawh thu sawiin, line department hrang hrangte leh khawtlang inkarah thawhhona tha chhawmnun zel a pawimawh thu a sawi bawk.

Thukhawm chuan Keilungliah kama View Tower siamna hmun atan Mawngchiah lui thut hahdamna hmar lam, tuikhuah chim chin atanga metre 15 vel hmun chu a thlang a, tuikhuah tlawhtu tumte tana en man ticketing system pawh sawiho niin, December ni 15, 2022 atangin tlawhtute tan luh man lak tum anih thu tarlan a ni a, puitlingah Rs 20/-, naupangah Rs 10/- , two wheeler Rs 20/-, three wheeler Rs 30/- leh four wheeler Rs 50/- zel lak tur a ni a, a buaipui turin Champhai Vengthar VC te chu inremna siampui tha tih niin inremna tur atana tulte leh kalpui dan turte sawiho a ni a, a tul ang zela ennawn leh nise tih a ni a. Tlawhtute tana lenkual velna tur Lawngleng (boat) dah leh himna kawnga hmalakna tulte zirchiang tur Sub-Commitee din a ni a. Keilungliah tuikhuah leh a kam tifaia hnatlan dan turte sawiho niin, tuikhuah tlawhtute chu faina ngaipawimawh hram hram turin an ngen nghal bawk.

District Level Committee on Post Completion Management & Maintenance of Dam Reservoir cum Recreation Centre at Keilungliah, Champhai thutkhawm tum linaah hian Executive Vice-Chairman Pu C.Lalhmachhuana, SE, PHED Champhai WATSAN Circle; Member Secretary Pu ZD Dengthuama, EE, PHED Champhai WATSAN Division, Member dangte leh sawm bikte an tel a ni.