Harhna avanga hun rei tak mipui thahnem takin Kelkang khua an chamchilh reng avangin tui leh inthiarna ah te leh kawng hrang hrangin harsatna a thleng a. Heng harsatna sutkian na tur ngaihtuah hi thil hmanhmawh thlak a nih avang leh englai pawh a hna dang thawk hman lova mikhual buaipuitu Kelkang khaw mipuite chhawmdawl na turin Mizoram sorkar chuan hma la in Chief Minister Pu Lal Thanhawla hova minister te leh department pawimawh hotute thukhawm chuan ruahmanna an siam a. Hemi atana sum mamawh te chu NLUP sum pangngai leh Chief Minister Special Package sum hmang lovin Banka NLUP sum dah pung hmanga thawh turin ruahman a ni.

 NLUP Implementing Board(NIB) hi Registered Society a ni a. Apex Board thurel angin sum tih chingpen awm thei laka inven nan leh thianghlim taka sum lut leh chhuak enkawl a nih theih nan Finance Department phalna la thlapin NIB Bank Account hawn a ni a. NLUP hnuaia sum sem tur leh hmanraw lei tur ang te Election chi hrang hrang avangin a hunah tih hman loh chang a awm thin a. Chumi avang chuan Banka dah hi a lo ngai thin a. Hemi pung tling khawm te hi Mizo mipuite tan a nih angin tangkai taka mipui tan vek hman a ni thin a. Tuna Kelkang Harhna avanga sorkar in chhawmdawlna tur ruahmanna a siam kalpui nan pawh banka NLUP sum pung(interest) hi hman a ni dawn a ni.