Vawiin khan Sport & Youth Services Deptt, Govt of Mizoram buatsaihin National Progamme of Youth and Adolescent Development (NPYAD) chuan Champhaia High School hrang hrangah Career Guidance an nei.
School pathum, Govt.Champhai High School, Govt.R.Hranga High School leh BC Lalthlamuana English Academy ah te neih a ni a. Govt. Champhai High School-ah hian Sport & Youth Director Pu Zothanmawia chuan a hmanpui a, thu sawiin, Sports hian rethei leh hausa, thingtlang naupang leh khawpui naupang a thliar hrang lova, Pathian tihmi, mi tumruh leh taima tak nih chuan hlawhtling turin retheihna leh kan chenna hmun hian min dal lo, a ti a, hlawhtlinna hi ka um peih lova, teirei peihna kan neih loh avangin kan beidawng a, mi retheiah kan chhuak thin zawk a ni, a ti.
Pu Zothanmawia chuan Sports lama mi ngaihsante zingah kan telve ngei tur a ni tih sawiin, he khawvelah hian hlawhtlin tuma bei ngar ngar tute tan bak din khaw chhuahna hmun a awm lo a ni, a ti a, zirlai naupangte chu an zirna piahlama infiamna lama tan la tura chahin, sang zawk thleng thei turin a fuih bawk.
Career Guidance hi BC Lalthlamuana English Academy-ah leh R.Hranga High school ah pawh neih niin, he hunah hian Pu Lalngilneia, DSYO chuan a kaihhruai a. Sports & Youth services Department Deputy Director Pu Thankhuma chuan he programme an neih chhan sawiin, naupangten zirna piahlama an rilrua leh taksaa hriselna an neih theih nana buatsaih an nih thu sawiin, vawiina zirlai naupangte hian he programme hi hlawk taka hmang turin a chaha, eng kawng pawh zawh dawn sela, pawimawh ber chu Pathian tihna leh tumruhna anih thu a sawia, mizo te hian teirei peihna kan tlakchham em avangin hlawhtlinna kan hmulo thina, zirlai naupangte hian kan thil tih tawh naah, sports lama kan kal anih chuan hlawhtlin tuma bei tang tang turin an fuih nghal bawk. Hemi hnu hian Zoenmawii, Clinical Psychology Aizawl chuan zirlai naupangte chu infiamna leh ruihhlo a kalkawp theilohzia zirtirna a pe a, zawhna leh chhanna hun hman nghal a ni.
Vawiin chawhnu khan Govt. Champhai High School-ah hian Adventure Club te chuan zirlai naupangte search & rescue training an neihpui a, rikrum thil thlena chet lak dan tur leh inven dan turte an zir a ni.
