Kelkang khawtlang tih hmasawnna tura Mizoram Sorkarin chhawmdawlna hrang hrang a buatsaih sakte enfiah turin leh a chhawr tangkaitu chhungkaw hrang hrangte kawmin nimin (13.10.2015) khan NLUP Media Cell hovin I&PR, AH & Vety leh PHE Department thawktute an kal.
Sorkar in a bik a Kelkang chhawmdawlna a kalpui mek chu mipuiten an chhawr tangkai hle a. Chhungkaw 239 awmna Kelkang leh Kelkang Vengthar-ten harh tharna thleng mek chhimtu mikhual an lo buaipui avangin kuminah nitin eizawnna thawk thei an awm lova. He harh tharna chhimtu mikhual hi nei ta lo pawh nise, Kelkang khawtlang chuan kuminah (thlawhhma la) ei leh bar zawnna kawngah harsatna an tawh tho dawn avang leh harhtharna in Kelkang khawtlang a nghawng a neih dan leh khawtlangin harsatna an tawhte chik taka zirchian a nih hnuah Mizoram Sorkar chuan kawng hrang hrangin chhawmdawlna a kalpui ta a ni a.
Kelkangah hian chhungkua (household) 239 awmin, chhungtin tan (tui khawlna tur) tuizem litre 2000 dawng pek vek a ni a. Chhungkaw 9 hnenah (Petty trade) eichawp/bar chawp Dawrte siamna pek a ni dawn a, Chhungkaw 19 hnenah Ar 50 theuh, chhungkaw 211 hnenah Vawk 2 theuh pek anih dawn bakah Ar inchung tur Rangva Bundle khat leh Vawk inchung tur Rangva Bundle chanve pek an ni. Swach Bharat Abhyan hmalakna hnuaiah Vangtlang inthiarna tur (Ek in) unit 160 chuang Rangva hmanga sak a ni tawh a ni.
Kelkang leh Dilkawn inkarah bawlhhlawh paihna hmunhma ruatfel a ni a, Ek in khat tawh chu Ek paih khawl motor hmangin paih ruahsak an tawh a, cheng nuai 9 vel senga Electric Eng pek belhna (LT line Extension) siam anih dawn bakah Dilkawn atanga Kelkang panna kawng pakhat km 1 leh a chanve a thui chu chei that a ni bawk. Tui harsatna sukiang turin Lungdup tlang panga tuilak bakah Greater Champhai Water Supply tui pekluh a ni a. Kelkang chawmzo thei tur an khaw ram chhunga lui pakhat chu lak turin ruahmanna siam a ni bawk.
Kelkang harhna thleng chhimtu mipui lut leh chhuak tam tak an awm vanga vangtlang hriselna leh faina vawnhim anih theih nan Mizoram Sorkar chuan Kelkang khawtlang faina turin kawng tam takin hma a la mek a. Mipui fuankhawmna tamna ber Hmun thianghlimah vangtlang inthiarna thahnem tak PHE Department kal tlangin siam a ni a. Kelkang khawchungah vangtlang inthiarna hmun engemawzatah dah anih tawh bakah Bawlhhlawh sawngbawlna hmun (Semi Anaerobic System Dumping Ground) Cheng Nuai 8 sengin Kelkang leh Dilkawn inkar Enga Kawrah ruahman mek a. Kelkang (dai) khaw luh dawnah pawh vangtlang bawlhhlawh sawngbawlna hmun ruahman mek a niin, Mikhual 200 chuang riah theihna tur Khualbuk pahnih siam zawh a ni tawh bawk.
Sorkar in Kelkang khawtlang tanpuina a ruahmante chu tunah hian pek tling tlak khat ni tawhin, chhungkawtin tanah Tuizem Litre 2000 dawng pek vek a ni tawh a. Vawk vulh thlangtu chhungkaw 211 hnenah vawk 2 theuh pek niin, Ar vulh thlangtu chhungkaw 19 te hnenah Ar note 50 theuh leh a chaw pek fel anih tawh bakah Dawrte siam (Petty trade) thlangtu chhungkua 9 te hnenah pawh tanpuina hi a pek tlak a ni tawh bawk.
Tunah hian Fur khawchhe zualah lang a harhna chhimtu an awm nual laiin riaklut erawh nitin mi 100 chuang an awm thung a. Chhinchhiah chinah Kelkang harhna chhimtu hi mi 2,35,035 chuang ni tawhin, khaw 436 atangin pan a ni a, Mizoram State pawn atanga pantu mi 2,330 anawm bakah India ram pawn (khawvel hmun hrang hrang) atangin mi 349 in an pan tawh bawk.
