Vawiin hian Lawngtlai BNRGSK Hall ah Lawngtlai District Fisheries Development Office buatsaihin NLUP 3rd & 4th Phase dawngtu tur chhungkaw 46 te leh RKVY atanga Sangha dil tanpuina dawngtute tan Sangha dil siam dan leh Sangha khawi dan zirtirna hun hman a ni a, NLUP dawng tura thlante hnenah hian 1st Installment hlan nghal a ni bawk.

He Fish Farmer training hi District Fisheries Development Officer Pi C. Lalparmawiin a kaihruaia, Fisheries Demonstrator pahnih T. Lalchhuanawma leh C. Ramthanmawia te bakah HC Lalrintluanga, Assistant Fisheries Officer ten Sangha dil buatsaih dan te, Sangha note enkawl dan leh an len huna enkawl dante an zirtir a ni.

3rd &4th Phase NLUP instalment hmasa ber dawngtu tura thlan chhungkaw 46 te hnenah hian Rs 40000 theuh pek nghal a ni a, hei hi NLUP Calendar of Work angin Sangha dil siamna tur a ni. Tanpuina dawngtute hi Lawngtlai District khawchhak lam tlang dung leh Lawngtlai khua leh a chhehvel a mite an ni.