Vawiin khan Kendriya Vidyalaya Lunglei chuan ‘Annual Day Celebration’ YMA Hall, Ramthar-ah an nei a. Annual Day lawmna inkhawm hi Ztu. Kingsuk Vattcharya-in a kaihruai a, Kendriya Vidyalaya Lunglei Principal Pu Rajeev Ranjan hnen atangin annual report ngaihthlak a ni.

Khuallian 28th. Assam Rifle CO Col. Navdeep Kadian chuan KV Lunglei-in nasa takin hmasawnna an nei zel chu lawmawm a tih thu leh nasa zawka zirtirtu leh nu leh pa ten tan an lak a pawimawh a ni, a ti. Tunlai khawvel changkang chho zelah zirlai naupangte pawh thiamna tak tak nei a tul a; Mizoram mai nilo ram pawn thlenga hna tha tak tak thawk thei tura an inbuatsaih chho zela, rinawmna leh taimakna nen theihtawp chhuah theuh turin duhsakna a hlan a ni. Col. Navdeep Kadian hian zirlai naupang tithate hnenah lawmman hlan na neih nghal a ni.

Vawiina KV Annual Function-ah hian zirlai naupang ten intihhlimna leh thiamthil hrang hrang, hnam lam leh lemchan te pawh an entir bawk a ni. Kendriya Vidyalaya Lunglei hi kum 2003-ah din a ni a, tunah hian zirlai naupang 200 chuang leh zirtirtu 16 an awm mek a ni. National Level programme hrang hrangah pawh lawmman chi hrang hrang an lo dawng tawh thin a, nikum 2013 khan Class X zirlai zaa za te chuan 7CGPA leh aia sang an hmu avangin Silchar Region-a Kendriya Vidyalaya 31 zingah ‘Best Result’ lawmman an dawng tawh bawk a ni.

Attachment

  • Loading attachment...