Vawiin chhun dar 12:30 khan Pu John Rotluangliana, Minister FCS&CA, etc. chuan C.L. Filling Station, Mamit-ah Ribbon chep chatin a hawng.

Hawnna thu sawiin Pu John Rotluangliana, Minister chuan Mamit ah Filling Station hmasa ber sawrkar thar ruala IOC hnathawh duhawm tak mai hawn theih a a lo awm ta chu a lawmawm hle a ni a ti a. Mamit leh a chhehvel a khua ten hmun hla tak a Tuialhthei thun tur an pan buai ngai lovin helai hmunah thun theih a lo ni ta chu Mamit District tan hmasawnna thar duhawm tak a ni tiin, he Filling Station hi mipuiten tangkai taka an hman ngei a beisei thu sawi a, C.L. Filling Station pawh mipui tana rintlak leh rinngam an ni tur a ni a ti a. A hmun atan Pi Rongengin a ram hlu tak maiah remchang a lo siam chu a entawn tlak hle a ni a ti bawk. Minister chuan Mamit District chhunga sorkar hmalak na hrang hrang te tarlangin Bairabi leihlawn pawh kumin chhunga siam zawh beisei a nih thu te, LPG chungchanga harsatna awm thin te leh a sut kian nana sorkar hmalakna te, LPG Bottling Plant lian zawk siam tur a hmalak mek a nih thu te, Mamit District Jail pawh puitlin tura chak taka hmalak a nih mek thu te leh Department dang dang hmalakna te pawh tarlangin, Mamit mipuite pawh rilru zau tak pu a, lungrual taka sorkar hmalakna te lo thawhpui a, lo tawiawm turin leh sorkar hmalakna te thahnem ngai taka a lo thlawp a, a lo pui turin a chah bawk a.

C.L. Filling Station hawnna inkhawm ah hian Pu D.Datta, Chief Manager, Guwahati, Indian Oil Corporation Ltd. in thusawiin he Filling Station hi Schedule Tribe, Hmeichhe quota in Pi C. Lalrinliani hi thlan a ni a. A hmun hma hi ni 45 chhunga buatsaih zawh a ni a ti a. C.L. Filling Station ah hian Diesel 20000 Litres leh Petrol 20000 Litres dah theih a ni.

Hawnna inkhawmah hian Pu R.S. Lalzamliana, DC, Mamit leh Department hrang hrang a hotute, Tlawmngai pawl hruaitute leh IOC lam thuneitu lam te an tel tha hle a ni.