Kepran khua chuan nimin (6 November, 2014) chawhma dar 11 khan YMA Diamond Jubilee an lawm. Pu R.L. Pianmawia, Deputy Chief Whip chuan he hun hi hmanpuiin khuallian a ni.

Kepran khua in an duhsakna leh engmah phut pawlh nei lova khuallian atana an sawmna ah lawmthu sawiin Pu R.L. Pianmawia chuan ram leh hnam humhalh a tul takzet thu sawiin thing leh mau, nungchate chereu tur ven a pawimawh thu a sawi a. Hnam dang chimral theihna kawng ah pawh inven a ngaih thu sawiin mahni hnamzia leh incheinate, tawng kam leh chet zia ah te hnam dang entawn uar lutuk na laka inven a tul thu leh a tha lai ah erawh chuan entawn chi a awm a ni tiin sum bawih ah tan a hlauhawm avangin dik lo tak leh awlsam lutuk a sum lakluh a him ber loh thu a sawi bawk.Khuallian hian Kepran khua chu YMA Diamond Jubilee lawm thei a hun tha leh hlimawm tak an neih lawmpui nan thilpek a hlan a ni.

Khual zahawm Pu H. Darzika, Secretary, State Election Commision pawhin thu sawiin zirlaite chu zir satliah mai lovin, lang thama zir chhuak turin a fuih a ni.

He programme kaihruaitu Pu Remsangliana President, YMA Kepran khua chuan Kepran khua YMA chanchin leh hmalak dan te a sawi a. Solo leh zaihona te nen hlim takin he hun hi hman a ni.

Pu R.L. Pianmawia, Deputy Chief Whip hian Zohmun leh Mauchar ah PHE hmalakna te a enpui nghal bawk a ni.