259/2026-2027

Aizawl, the 23rd April, 2026 :  Vawiin April ni 23, 2026 khan I & PR Auditorium, Aizawl ah Mizo Thu leh Hla Inpui (Mizo Academy of Letters) chuan an pawl din champha lawmna hun an hmang a. Pi Carol VLMS. Dawngkimi, Director, Art & Culture, Government of Mizoram chu khuallian a ni.

Pi Carol VLMS. Dawngkimi, Director, Art & Culture, Government of Mizoram chuan ‘Kham leh Suar’ thawnthu ziaktu Pu Lalrammawia Ngente hnenah Book of the Year 2025 chawimawina thu ziak leh pawisa fai Rs 10000 a hlan a ni. Khual lian hian Dr. Darchuailova Renthlei, Dr. H. Laldinmawia leh Tv Lalrinngheta te lehkhabu a tlangzarh nghal bawk a ni. He huna khual lian Pi Carol VLMS. Dawngkimi chuan Book of the Year 2025 chawimawina dawngtu Pu Lalrammawia Ngente a lawmpui thu sawiin, dawng awm tak tak an awm teuh laia hetiang chawimawina hlu tak dawng thei a awm chu malsawmna leh vanneihna a nih thu a sawi a. Khual lian chuan MAL chu pawl zahawm tak a nih thu leh Art & Culture Department nen pawh an thawhhona leh in zawmna a that thu te, thu leh hla hi mihring nun min siam thatu leh nun kawng dik a min hruaitu niin, khawvel leh India ram sukthlek thlirin, kan hnam nunphung, history bakah thawnthu phuah thar lam pawh kan uar deuh deuh a tul thu sawi bawk.

MAL pawl din champha lawmna hi Prof. RL. Thanmawia, President, Mizo Thu leh Hla Inpui chuan kaihruaiin, Dr. Zoramdinthara, Ziaktu Lian chuan pawl dinhmun leh hnathawh tlangpui tarlangin, kum 2025 chhungin Mizo tawng lehkhabu 223 a chhuah thu te, MAL chuan lehkhabu tha chu tehfung hrang hrang hmang a teh a nih hnuah a tha ber thlan a nih thin thu a sawi a. Thu leh Hla Inpui Joint Headquarters leh Branch atangin report tawi ngaihthlak a ni bawk.

MAL in Book of the Year 2025 a hlan chhan thuziakah chuan “He lehkhabu hian mihring nun chhungril khawharna leh hmun hlauhawm tak tak a hai lang a, khawtlang nun inthlak meka sual ngaihzamnain nun a tihchhiat dan te, Pathian hmangaihna leh beiseina nungin sual thûk taka tlu tawh pawh a tuam dam theih zia te thiam takin a tar lang a ni. Chuvangin, Thu leh Hla Inpui (Mizo Academy of Letters) chuan kum 2025 chhunga Mizo tawnga chhuak lehkhabu zinga tha ber 'Book of the Year 2025' atan a thlang a ni’ tiin.

Kum 1989 atang a MAL in a hlan tan Book of the Year chawimawina hi tum 37 zet hlan a ni tawh a. Chawhnu programme hi Prof. Rualkhuma Colney, Mizo Thu leh Hla Inpui Vice President chuan kaihruaiin, Dr. Lalthlamuana Ralte buatsaih ‘Tunlai Thiamnain Mizo Thu leh Hlaa Hnuhma a neih Dan’ tih chu zirho a ni bawk.