260/2026-2027

Dated Aizawl the 23rd April, 2026 : Vawiin khan School Education Minister Dr Vanlalthlana chuan a office chamber-ah thuchah sawiin Mizoram Board of School Education buatsaih, HSLC Examination 2026 result ruahman lawk anga  tihchhuah a ni ta chu lawmawm a tih thu a sawi a. Zirlai exam hmachhawn mi 18,257 aṭanga za zela 80.31 laiin hlawhtlinna an chang thei leh nikum aia pass percentage a sang a, zaa 80 lai a kai thei chu  lawmawm a tih thu a sawi.

Minister chuan kumin HSLC result chhuakah hmasawnna lawmawm tak Govt School-ah a lo lang tiin  nikuma Govt School a pass zaa 68.01 chu kumin hian khumin zaa 72.07 an pass a, Candidate zawng zawng an fail vekna school-ah RMSA School la nei nual mah ila, Govt school tih hmingpu an lang tawh lo leh zaa za an pass vekna school-ah kum dang aia Govt School an lang tam a, Govt School 21 zet an lang chu lawmawm a tih thu a sawi a. Kan result hian zirlaite tan Govt school a belhtlak tih a rawn tarlang a ni a ti.

Minister chuan kumina result tihchhuah dan chu a lo puanzar tawh angin kum dang aia a danglam thu leh top ten leh Division te an lan tak loh thu te, MBSE website-ah erawhchuan zirlaiten an mark leh percentage an en zung zung theih thu leh hei hi board dang pawhin an kalpui dan a nih thu a sawi a, hei hian a tha zawnga nghawng a neih chhoh zel a beisei thu a sawi a ni.

Minister chuan Zirlai hlawhtlinna chang thar zawng zawngte thinlung taka a lawmpui thu leh an hma lam hunah hlawhtlinna an chan zel theih nan duhsakna sang ber a hlan thu a sawi a. Hlawhtlinna chang zo ta lote pawh beidawng mai lova nasa zawka ṭan la sauh sauh tur leh result lawmawm nei thei ngei turin a  chah a ni.

Minister chuan result a hun taka chhuah a nih theih nana buaipuitu MBSE te, school zirtirtute, zirlai nu leh pate, khawtlang leh zirna kaihhnawiha theih tawp chhuahtute zawng zawng chungah lawm thu a sawi a. Mizoram zirnain hma a sawn zel theih nana theih tawp chhuah chhunzawm zel turin zirna kaihhnawiha thawktu zawng zawngte a sawm bawk a ni.