Aizawl District Magistrate chuan CRPC Section 144 (Act II of 1974) tlawhchhanin kumin Lok Sabha inthlan vuakvet chhunga mipui an him zawk nan leh inthlan boruak muanawm tak a awm theih nan silai, puaktheithil chi hrang hrang leh aurinna hman Aizawl District chhungah a khap a. Tumahin thuneitu hnen atanga phalna hmulo chuan silai, puaktheithil leh aurinna hman emaw, lek lan reng reng a khap tlat a. Silai license pek chhuah pawh hemi chhung hian khap a ni ang.

Hemi rual hian District Magistrate chuan Aizawl District huam chhunga mimal Silai nei leh kawl zawng zawng te chuan, mahni awmna atanga Police Station/Police Outpost hnai berah tung/dah (deposit) vek turin a hriattir bawk. He thupek hi hman nghal niin, sut leh a nih loh chuan May ni 16, 2014 thleng ken kawh tur a ni.

He khapna thupek hian magistrate, venghimtu police, sipai, leh BRTF mi leh sate a huamlo ang a. Dan bawhchhiate chu an chungchang dan anga ngaihtuah an ni ang.