Mara hnam kut pawimawh tak pakhat Lyuva Kuthla Festival chu March ni 14, 2014 (Zirtawpni) khan Tuipang ‘V’-ah Kut Pa Pu Vabeiha Hlychho, Director, Tourism Department hovin ropui taka hman a ni.

Pu Vabeiha Hlychho chuan Kut hawnna puanzar pawtpharhin, ‘hnam rohlute – hnam zaite, hnam zia rangte leh khawsak dan phung leh nun zemawite hi humhalh a, tihhmasawn zel hi thangtharte mawhphurna ani’, a ti a. Heng festival leh hnam rohlute hmang hian Mizoram inpumkhatna bakah India ram impumkhatna atan hlawk taka thawh theih a ni tih hre reng turin kalkhawmte chu Kut Pa chuan a chah a ni.

Kumin Lyuva Kuthla Festival hi Tuipang ‘V’ MTP Sub-headquarters-te, M.Ch.P leh khawtlang hruaitute huaihawt a ni a. He kut hi pipute lo vah zawh awllen laia lo hman thin a ni a. Kuminah pawh hian Tuipang leh a chhehvel khaw hrang hrang atangin hnam lam chi hrang hrang entir a nih bakah pipute la deh dan te, hmanlai puancheite leh incheina puantah chi hrang hrang entir a ni bawk. Kut-ah hian tunhnaia Tuisih Lui a naupang pahnih tui tla huaisen taka chhanchhuaktu Lawkhei S/o Pu Kale, Zawngling hnenah huaisen chawimawina certificate hlan nghal a ni.