Vawiin khan Department of Agriculture (Crop Husbandry) buatsaih ni hnih awh tur Kharif Workshop – 2012 chu Agriculture Conference Hall-ah neih tan a ni. He Workshop-ah hian Mizoram Agriculture Service (MAS), Agriculture Extension Officer (AEO) chin chung lam zawng te chu he Workshop-ah hian an tel a ni. Workshop-in a tum ber chu kumin chhunga buh leh bal tam zawk thar turin tan la tura thawktute infuihna leh inzirtirna a niin Workshop Thupui-ah ‘Produce More Rice’ chu hman a ni.

Workshop hawnna inkhawm hi Pu T.V. Fambawl, Secretary, Agriculture Department chuan kaihruaiin Pu Lalrinliana, Joint Director of Agriculture chuan sawi hawnna hun a hmang. Pu K.S. Thanga, Parliamentary Secretary, chu Khuallian a ni a. Shri Evans T. Munsong, Asst. Manager, NABARD chuan Power Point hmangin Joint Liability Groups chungchanga loneituten Bank Loan kal tlanga Loan an lak theih dan tur chungchang a sawifiah.

Khuallian Pu K.S. Thanga chuan, “Sorkar Flagship Programme–NLUP hlawhtlin nan Agriculture Officer-te kutah thui tak a innghat a. Mizoram puma kan Officer lo kal khawm te hian theihtawp chhuah ula, Monitoring thlengin uluk taka thawk turin ka chah duh che u a ni. Ti tha duh lo leh thawk tha duh lote chu hrem ka hreh dawn lo a ni. Pathianin kan ram hi chawmhlawm state ni tura a din a ni lo va, Agriculture hmanga kan din chhuah a ngai a ni. NLUP pawh hi a enkawltu Kristian-te hian kan tihhlawhtlin loh chuan a hnam angin a zahthlak dawn a ni.” a ti a. A sawi zelnaah Khuallian chuan State hausa zawkte pawhin an tih theih loh Tractor leh Power Tiller 75% Subsidy Mizoram Sorkar-in a pe thei hi mak an ti a, loneitute hi chawikan an tum tak tak a ni tiin an sawi thin thu a tarlang a, Agriculture Department-a thawk nih chu a inchhuan thlak thu sawiin Sorkar-in thawktute chungah rinna a nghah ngam thu leh mahni mawhphurhna theuh te hlen chhuak tura a beisei thu a tarlang bawk.

Chawhnu lamah Pu Lalrinliana, Joint Director of Agriculture kaihhruaiin Technical Session hman a ni a. Dr. H. Saithantluanga, Deputy Director (Planning) chuan RKVY hnuaia kumin nipui chhunga buh tam zawk thar dan tur ruahmanna chungchang zirtirna Power Point hmangin a pe a, Pu Lalthanzuala, SMS (Agro) chuan buh thar dan technology hrang hrang zirtirna a pe a, Pu Lalchhanliana, E.E (Agri. Engg.) chuan khawl hmanga loneih dan zirtirna pein Pu C. Lalnithanga, APPO chuan Mizoram buh natna hrang hrang leh a ven dan zirtirna a pe bawk.

Kharif Workshop - 2012 hian naktuk ni 19.4.2012 thleng a awh ang.