Khatla kawngchung leimin leh lei tlahniam mek chu vawiin khan UD&PA Secy Dr.C Vanlalramsanga leh sawrkar mipawimawh dangten an tlawh a, helai hmunah hian harsatna lian zawk a thlen lohna turin hmalak dan tur a hmunah hian an enfiah nghal a ni. 

Helai lei chet avanga vanduaina thleng hmasa ber Bible House thiah hna hi chawlh lawk awm miah lovin  thawh mek a ni a, naktuk atang hian Bible House hnuai atanga BSNL office hnuaiah Gabion Wall siam a ni anga, lei tlahniam zel tur venna turin Micro Piles dah tum a ni bawk a, hemi atan hian sawrkar chuan private construction firm a ruai dawn a ni. 

UD&PA Secy Dr.C.Vanlalramsanga chuan Aizawl Convention Centre sakna tur hmuna khuarel vanduaina thleng hi sawrkar in pawi a tih thu a sawi a, chhiatna thleng zel tur venna turin sawrkar chuan hma ala mek a ni a ti bawk. 

Helai hmuna Aizawl Convention Centre sak a nih hma hian sawrkar chuan a lei awmdan te a zirchian thu leh Geology and Mining Department zirchhianna angin helai hmun hi 'Low Hazard Zone' ah dah a ni a, hei vang hian lei laih hna pawh hi thawh tan a ni. 

Tun kar tira ruahsur nasa avanga lei tlahniam avangin Baptist House a cheng chhungkaw engemaw zat in sawn chhuak an awm a, hengte hi sawrkar chuan zangnadawmna a pek theih nan hma ala mek a ni.