Vawiin chawhnu khan MLA leh MHIP Adviser,  Pi Vanlalawmpuii Chawngthu chuan National Award-Nari Shakti Puraskar 2016, Mizo Hmeichhe Insuihkhawm Pawl(MHIP)-in an dawn lawmna  Lal Thanhawla Auditorium-ah a hmanpui. 

Pi. Vanlalawmpuii Chawngthu chuan MHIP-in he National award a dawng hi lawmawm a tih thu sawiin hmeichhia te pawimawhna hrang hrang a tarlang a. Kan ram enkawlna chungchang ah mipui te hian chanvo tam tak neiin hemi kawnga hmeichhia te mawhphurna chu hlenchhuak turin a fuih a. MHIP chu mi mangang leh harsa te tlukluhna an ni tiin, hmeichhia te chawikanna kawnga tan la zel turin a chah a. Kalkhawm te chu an eizawnna lamah buai mahse  chhungkaw enkawlna ngai pawimawh turin Pi. Vanlalawmpuii Chawngthu chuan a sawm nghal bawk a ni. 

National Award-Nari Shakti Puraskar hi Sawrkar laipuia Ministry of Women and Child Development bultum niin kum tin March Ni 8-ah International Women’s Day denchhen in sem chhuah thin a ni a. He award hi hmeichhia te hmasawnna leh dawm kanna tura thawk tha mimal leh tlawmngai pawl te hnena hlan thin a ni. 

He hunah hian Dr.Thanpuii, Vice President, MHIP Gen.Hqrs chu chairman niin Pi Lalthlamuani,President,MHIP Gen Hqrs chuan thu a sawi a. Pi. Vanlalawmpuii Chawngthu chuan MHIP Hla bu release na neiin tlawmngai pawl hrang hrangin thu an sawi bawk a ni. 

Mizo Hmeichhe Insuihkhawm Pawl(MHIP) hi kum 1974 khan din tan niin tun dinhmunah hian headquarter 1 ,sub-headquarter 7 leh block 16 a awm mek a ni.