Vawiin khan Hunthar lei tlahniam chungchangah Disaster Management and Rehabilitation Department chuan bialtu MLA Pu Lal Thanzara, I&PR Minister ni bawk hovin a pisaah Meeting an nei.

He meeting-ah hian Hunthar lei tlahniam leh che zel tur ven nana hmalak dantur sawiho a ni a. Bialtu MLA Pu Lal Thanzara chuan Hunthar lei tlahniam chu a ngaih pawimawh thu leh a rang thei ang bera hna thawk turin Disaster Management & Rehabilitation Department hotute chu a hrilh a. Hunthar lei tlahniam siamthatna tur atan hian cheng vaibelchhe 15 National Disaster Management Authority (NDMA) a dil mek chu hmuh ala nih rih loh avangin leh tunlai khaw awmdan thlirin a rang lama hna pawimawh zual thawh tula hriat a ni a. Disaster Management & Rehabilitation Emergency Fund atangin cheng vaibelchhe 2 lo hmang lailawkin hna pawimawh zual pahnih; lei tlahniama tui luanglut tur ven nan Pi B.Sairengpuii kawmchhaka drain siamthat/tihthuk leh in hlauhthawnawm ho venhim nan kawnghlui tlabal tawh ah retaining wall ngelnghet siam tum a nih thu meeting-ah hian sawi a ni a. Hna hi April ni 10, 2017 (thawhtanni) ah thawh tan tura rel niin zawh vat anih theih nan chhun leh zana thawk turin ruahmanna siam a ni.

Hna thawk tur hian AIE (Architecture Interior and Engineering) thlan tawh an ni a, anni hi Ramhluna lei tlahniam thawm that hna lo thawk tawh tu te an ni.

Meeting ah hian Disaster Management & Rehabilitation Department hotute an tel kim hle.