Vawiin hian International Fund for Agricultural Development (IFAD) Missions Team chuan Serchhip leh Thenzawl tlawhin kuthnathawktute, kuthnathawktu pawl hotute, khawtlang hotute leh NLUP Line Department hotute an kawm a. Mizorama Loneitu leh kuthnathawktute chawikan dan tur ruahmanna thar siam dan tur an rawn zir chiang.
IFAD Missions Team, member 11 awmna chuan Mizoram zirchiang turin nimin Dt 6.4.17 khan Aizawl rawn thleng in Team hrang hrang paliah an inthendarh leh a, chung zinga Team pakhat, member pahnih Pi Meera Mishra, Country Co-ordinator leh Dr. Venkatesh Tagat, NRM Specialist te awmna chuan Serchhip District hi vawiin atang hian zirchianna hi an rawn nei tan a. Chawhma lamah Thenzawla Puantahtute nena inkawmna hun an hman hnuin Puantahna hmunte an tlawha, chumi zawhah AH & Vety Farm te, Fisheries Department Farm te leh PIGFED hoten Vawkpui an vulhna hmun, Thenzawla mi vek te chu an tlawh kual leh nghal bawk. Thenzawl tlawhtu IFAD Team te hi Thenzawl SDO, Pi Lalnunmawiin a lo dawng sawng a ni.
Thenzawla hun an hman zawh hian IFAD Team te hian Serchhip tlawh leh nghalin Serchhip DC Conference Hall ah kuthnathawktute, kuthnathawktu pawl hrang hrang hotute, AMFU aiawhte khawtlang hotu leh NGOs te leh Chanchinbumite nen inkawm hona an nei leh a, heng an inkawm honaah hian IFAD Team te hian kuthnathawktuten hmasawn zel tura an mamawh hrang hrangte zawtin inpawh tlang takin inkawm hona hun an hmang a ni. Serchhip ah hian Pi Zosangzuali Pachuau, Addl. DC in inkawm hona hi kaihruaiin Pi Meera Mishra, Country Co-ordinator hian IFAD kalphung sawifiahna hun a hmang bawk a ni.
Ruahman dan chuan IFAD Team te hian naktukah Chhingchhipa MIFCO Plant an tlawh bakah loneitu leh khawtlang hruaitute an kawm leh anga, hetiang bawk hian Khumtungah hun an hmang zui leh nghal bawk ang.
IFAD tanpuina in Mizoram sawrkar chuan District pali, Serchhip, Kolasib, Champhai leh Mamit ah, Block 11 a chhungkaw 64,000 huam turin Mizoram Integrated Agriculture, Natural Resources Management and Livelihood (MIARMAL) Project, NLUP kalphung zuia kalpui tura ruahmanna siam mek a ni a. He hmalakna tur atan hian International Fund for Agricultural Development Missions Team, mithiam hrang hrang awmna chuan heng District thlan palite hi an fang kual mek a, an thil hmuh leh zirchhuahte atangin hmalak dan tur kimchang Mizoram sawrkar hotute nena inberawn chungin an rawn duang chhuak dawn a ni.
IFAD hi kum 1977 a United Nations in ram thang meka retheihna umbona kawnga hnathawktu bik atana a din a ni a. An hmunpui chu Italy ah awmin UN hnuaia Funding Agency lian tak pakhat a ni.
