Parliamentary Secretary Pu Hmingdailova Khiangte, bialtu MLA ni bawk chuan vawiin khan Mualkhang RMSA High School a hawng. 

Pu Hmingdailova Khiangte chuan Mualkhang khuain a mamawh em em RMSA High School hawn a ni ta chu lawmawm tiin High School hawn a nih theihna tura tan la tu khawtlang hruaitute leh Mualkhang khaw mipui te chungah lawmthu a sawi a. Zirlai, zirtirute leh nu leh pate chu school tha an neih theih nan mawh an phur tlang tih hre tur leh hlawhtling tura thawhrim a pawimawhzia hria a tan la thar turin a fuih a ni. HIV/AIDS dar chak lutuk chungchang sawi langin Parliamentary Secretary chuan he natna hlauhawm tak hi Mizoramah a hluar sawt hle a, inveng fimkhur turin mahni insumtheihna a pawimawh a ni, a ti a. Rail kawng siam mekah Mualkhang chu a tangkaipui thei ber tur khaw zingah a tel ve dawn tih sawiin thawh tur awm apiang taima taka thawk a, hnam dangte aia taima tura lo inbuatsaih lawk turin a chah bawk a ni. 

Mualkhang khua hian mipuite thawh khawm hmangin February ni 11, 2011 khan private High School an din a, kum 2015 thleng khan he school atang hian mi 8 in HSLC an passed chhuak tawh a ni. Kum 2016-17 session-ah hian mi 6 in HSLC result an nghak mek. He private H/S hi RMSA igh school-ah sawrkar chuan a hlangkai ta a. Tun dinhmunah Headmaster leh zirtirtu pali awmin naupang sawmhnih chuang an awm a ni. 

RMSA High School hawnna inkhawm Remna Hall-ah neih hi Mualkhang VCP Pu R.Lalrohlira’n a kaihruai a. Kolasib DEO leh khawtlang hruaituten thu an sawi a ni.