3663/2023-2024

Aizawl, 5th February, 2024 :  February ni 5 - 14 chhung hian Mizoram chhung district hrang hrang zinga  Rural Development Block sawm leh pakhat (11) huamchhung a khaw 165 ah MGNREGS Social Audit neih a ni ang.

Social Audit neih tur pual hian January ni 30 khan  District leh Block tin atanga official ten nen Social Audit Entry Meeting neih ani a, Pi C. Laltleipuii, Director, Social Audit Unit, MISSAAT, Mizoram chuan Entry Meeting hi kaihruaiin Social Audit tangkaina te, a thil tum te leh mamawh tur hrang hrang te a hrilhfiah a ni.

He Social Audit neih tur hi Social Audit Expert , District Resource Person leh Block Resource Person 55 bakah Village Resource Person 165 ten an kalpui ang.

Kum 2005 a siam MGNREG inkaihhruaina dan in Gram Sabha hnenah Social Audit neih theihna chanvo a pek ang leh he dan hnuaia Section 17-na in khaw tinah social audit hi kalpui vek tur a tih angin, Director kaihhruaina hnuaiah level hrang hrang-District, Block, Village level-ah te social audit hi neih thin a ni a. Social Audit Unit din tirh atang hian Mizoram khaw hrang hrangah social audit vawi 3249 neih tawh a ni.

Social audit hian a tum ber chu mipuite chawikanna leh hmasawnna scheme hrang hrang sawrkarin a siam atanga hamthatna dawngtu, a bikin thingtlangmi, hna kalpui a nihna khuaa mipuite leh a scheme buaipuitu official zawng zawngte nena tangkawpa, a tha thei ang bera a hlawhtlinna hmuh a nih theihna tura theihtawp chhuaha endik pui hi a ni. Langtlang, rintlak leh awmze nei taka hnathawh reng reng kalpui a nih theihnan leh mipuite hmasawn nan social audit hi a pawimawh em em a ni. Mipuite’n an dikna chanvo an hmuh ngei theihna tura hriattir pawh tih makmawh nia hriaiin audit neih a nih apiangin hetiang lam hawi hian mipuite hnenah zirtirna pek tel thin a ni bawk.