Dt. 24.3.2019 (Inrinni) khan Lunglei District-a Haulawng khuain an khawtlang Faina leh thianghlimna kawnga an hmalakna chu Pi C. Lalremruati, DIPRO Lunglei hovin, Mizoram Journalists Association Gen. Hqrs.  hruaitute Pu Zonunsanga Khiangte, President leh Pu C. Lalhmachhuana Gen. Secretary leh MJA Lunglei District hruaitute an President Pu H. Lalthansanga hovin a hmunah an enpui a, Haulawng khawtlang hruaitu VC te chuan an lo dawngsawng a. Khaw chhung pumpui fankual niin Faina kawnga an hmalakna te an EN ho nghal a ni. 

VC House-ah khawtlang hruaitute nen an hmalak dan chungchangah inkawm hona hun hman a ni a, he hun hi Haulawng VCP KH Tialthanga chuan kaihruaiin, an hmalak dan hrang hrang a sawi.

Lunglei DC kalta Dr Ankita Chakravarty IAS hmalakna in Oil India Ltd in bawlhhlawh paih na motor an pe tih sawiin, hemi hmang hian kar khatah tum hnih Thawhlehni leh Zirtawpni ah te bawlhhlawh an paih thin niin a sawi. VC te kaihhruaina hnuaiah NGO hrang hrang telna Clean and Beautification Committee dinin fai leh khawtlang cheimawina kawngah theihtawpin hma an la tih an sawi a. Khawlai dungah bawlhhlawh awm lo tur te, inthiarna tha tak chhungtina neih vek te, mipui thinlungah naupang atanga puitling thleng pawhin Fai leh thianghlimna an rilruah tuhngheta thanhnan tur te, Section Fai inelna an buatsaih thin thu te, chhungtin hnena ngenna an siam thu te, veng thentet faina kawnga hmalakna te an neih thin bakah School tinah Faina kawnga ngenna te an neih bakah MGNREGS hmangin an khawtlang faina kawngah hna an thawh thin thu a sawi a. Hei bakah hian an khawlai hmun remchang laiah thingphunin Ashoka Tree bakah Herhse te an phun a, khawlai hmun remchangah an Flower pot te dahin, Faina leh thianghlimna kawngah inzirtirna thu Signboard tam zawk tar zel an Tum thu a sawi bawk. Hei bakah hian bawlhhlawh paih miah lohna hmun 'litter free zone' siam te chu an hmachhawp a nih thu sawiin, Faina kawngah Volunteer pawh an neih chhoh mek thu a sawi.

He hunah hian Pi C. Lalremruati, PRO Lunglei chuan Hawlawng khawtlangin sawrkar hmalakna hrang hrang a tawiawm tha thin a, Faina kawnga an hmalakna pawh chhuanawm a tih thu leh khawlai dung fai tak mai te chu hmuh a nuamin, an hmasawn lehzelna tur atan thurawn hrang hrang te sawiin, an khawtlangin an hmalakna kawnga puanzar ngai leh an tihawm awmah te inthlahrung lova hrilh hre zel turin a chah bawk.

Pu Zonunsanga Khiangte, President, MJA Gen. Hqrs. Aizawl chuan, Haulawng khawtlang hmalakna chu a chhuanawmin, Mizoram khaw fai ber in ni thei a, khawchhung inkalpawhna tha tak Black top lohna hmunah pawh RCC-a siam a ni vek te chu Mizoramah hetiang khua hi a tam lova a rinthu sawiin, a khawlai dung cheimawina kawngah tun aia nasa zawka hmachhawpa in neih chhoh zel a tul a, Haulawng khaw chhungah Reserve ram ruak zau tha tak mai ngaw innei te hi a chhuanawm em em a, nakinah chuan Haulawng khua hi Mizoram hmun hrang hrang atangin an la tlawh luai luai dawn a ni, tiin an hmasawnna kawng hrang hrang fuihna leh thurawn a pe bawk a ni.

Pu H. Lalthansanga, President, MJA Lunglei District pawhin, Haulawngin Faina kawnga theihtawp an chhuah chu thil lawmawm tak a ni a, Mizoram khaw fai ber a nih lona a awm lo va, khawlai dung cheimawina kawngah hma lak lehzual a pawimawh a, Mizoram khawfai ber Haulawng a nih chuan District ang pawhin Lunglei Dist. ti hmingthatu a ni dawn a, he Faina kawnga in hmalakna hi bul tanna chauh ni se, hun lo kal lehzel turah hmasawn zel turin duhsakna a hlan bawk.

Haulawng khawchhung fankual pah hian Haulawng khuaa entrepreneur hlawhtling, Mizoram Kailawna lawmman la tu Ramdinmawia, Organic Leitha siamtu leh Mizoram Science, Technology & Innovation Council (MISTIC) buatsaih Mizopa Technlogy hmanga inelna buatsaiha pakhatna lawmman dawngtu puantah khawl, La hlumna khawl, vawkchaw channa khawl etc hrang hrang siamchhuaktu Chhuanmawia te an tlawh nghal bawk a ni.

MJA Lunglei atang hian an President bakah Pu R. Lalnunthara, Adviser MJA bakah Office Bearer dangte he hunah hian an kal bawk.

Attachment

  • Loading attachment...