Vawiin khan Dawrpui Multipurpose Centre-ah ZIDCO (Zoram Industrial Development Corporation Ltd.) buatsaih Aizawl Special Handloom Expo-2019 hawnna neih a ni a. ZIDCO Managing Director Pu Lalramsanga Sailo, IRS chu Khuallian niin Handloom Expo hi a hawng a. Handloom Expo hi National Handloom Development Programme (NHDP) bultum a ni.

Khuallian Pu Lalramsanga Sailo, IRS chuan thu sawiin ZIDCO leh handloom hian inzawmna thuk tak an nei a, kan ramin handloom lama hma kan sawn chhan pakhat chu ZIDCO hnathawh rah a ni, a ti a. Tun thlengin ZIDCO kaltlang hian mi tam takin eizawnna ngelnghet an nei tawh a ni, a ti a. Ministry of Textile in 4th Handloom Census a buatsaihah khan Mizoram chhunga puantah leh a kaihhnawiha inhmang zat mi 28,539 an ni a, hei hian eizawnna atana handloom hmang an thahnem hle tih a entir a ni, a ti a. Kan ramin Border Trade Centre hmun hrang hrangah a nei a, kan puantahte hi kan trade centre atangin thawh chhuah a, sumdawnna lian zawk kalpui theihna tura kawng a inhawn hun a nghahhlelhawm hle a ni, a ti a. National Handllom Development Programme (NHDP) leh North East Region Textile Promotion Scheme (NERTPS) hnuaia scheme tha tak tak te chhawr tangkai lehzual a pawimawh thu a tarlang a. Handloom Expo hlawhtling tak nei turin kalkhawmte chu duhsakna a hlan a ni.

Ministry of Textile hnuaia National Handloom Development Programme (NHDP) hian handloom hmasawnna a ngai pawimawh hle a. State hrang hrangah handloom exhibition bultumtu an ni thin a ni. Expo-ah hian stall sawmthum (30) siam a ni a, March Ni 25-28, 2019 chhungin neih a ni dawn a ni.

ZIDCO Manager Pu R. Lalsangzuala chuan programme hi a kaihruai a, ZIDCO Asst. Manager Pu V.L. Huma chuan lawmthu sawina hun a hmang a. Commerce and Industries Department, Weavers Service Centre, Aizawl, All India Handloom Board member, ZIDCO hnathawkte leh Handloom Society hrang hrang an tel a ni.