Dated Serchhip, the 10th February, 2023: Vawiin hian Serchhip DC Conference Hall ah District Urban Development Office huaihawtin nikuma khawpui fai inelna Category - II (District Headquarters) a Serchhipin pathumna lawmman an dawn lawmna leh faina lama infuihtharna hun buatsaih a ni a, Pi Nazuk Kumar, IAS, Bawrhsap chu khuallian a ni.

He hunah hian Pi Nazuk Kumar chuan, kum kalta a khawpui fai inelnaa pathumna kan dawn theih nana tha thawhtu zawng zawngte chungah lawmthu ka sawi a, Mizote hian kan thinlungah faina hi kan tuhnghetin kan nunpui tawh ni hian ka hre thin a, kan hmunhmate a faiin a thianghlim tlang hle tawh a ni. Amaherawh chu hmasawnna tur nei tawh lo kan ni lo thunga, faina kawnga thapui han thawhna tur kan la nei a ni tih hriaa kan thawhzui zela, kan fate thinlungah pawh nghet taka kan tuh a tul hle a ni. Tin vawiina kan lawm hi Pathumna a ni a, hei ringawt pawh hian nasa lehzuala tan kan lak a tulzia min hrilh a ni. Serchhip hian bawlhhlawh sawngbawlna tur hmunhma thar Chhiahtlang daiah kan puah mek a, a puitlin hunah chuan kan bawlhhlawhte fel fai takin kan chingral thei tawh dawn a ni. Vawiina kan fai theih nan hian kan Bawlhhlawh paihtuten bawlhhlawh an thiar reng a, tual phiattuten an phiat reng bawk a, mi tlawmngai leh thahnemngai tam tak kan nei a, VC ten mahni huam chhung theuh kan tifai thin bawk a, an chungah ka lawm hle a ni, a ti a. Faina inelna lo awm leh turah pakhatna ni thei ngei tura theihtawp chhuah tlang turin Serchhip mipuite a sawm bawk a ni. Khuallian hian lawmman dawn hriatrengna tur bawlhhlawh bawm VC tinte hnenah a hlan nghal bawk a ni.

Pu Lalmuansanga Ralte, Addl. DC pawhin kalkhawmte lawmna thusawiin, Serchhip district mipuite rilru a tluan avangin kawng hrang hrangah hmalak a nuam thin tih a sawi a. Tuna kan lawm mek faina lama kan lawmman lak chhan pawhin Serchhip khawpui chhunga VC leh tlawmngaipawl hrang hrangte inpekna leh thuawihna vang a nih thu a sawi a. Zaipawl zai rimawi tak siam chhuak tura zaipawl members ten an mawhphurhna theuh hneh taka an hlen ang hian faina lamah leh hmalakna dangah pawh mahni zawn theuhva mawhphurhna kan lo hlen kha a ngai thin a ni, a ti a. Bawrhsap fel leh rilru tluang tak, kan mil tawk zela min kaihruai thiam kan neih avangin kan district kan nihlawh hle bawk a ni, tiin Pi Nazuk Kumar chungah pawh lawmthu a sawi a ni.

He hun hi Pu Lalrinsanga Hnamte, DUDO in a kaihruaia, Lt. Vanlaltharzuala, CO, Salvation Army chuan hunserh hmangin fuihna thu Pu B. Vanlalngura, Chairman, Serchhip Town Jt. VC in a sawi bawk.