3535/2022-2023
Khawzawl, the 10th February, 2023: Khawzawl District Magistrate, Pu C.C. Lalchhuangkima chuan Sec 144 CrPC, 1973 (2 of 1974) in thuneihna a pek angin Khawzawl District chhung khawi hmunah mah dan ang ni lova Kuhva lak luh leh phurh phal a nih loh thu a chhuah.
Khapna thupek chhuahin a tarlan dan chuan Khawzawl District chhung khaw hrang hrangah dan ang ni lova Kuhva phur lirthei an kal thin tih hriat a ni a; heng lirtheite hian kawng an tichhe nasa hle tih hriat a ni bawk. He thupek hi Khawzawl District chhunga dan phal lova Kuhva phurh a lo rem theih nan leh, kawngte a lo him zawk theih nana chhuah a nih thu a tarlang bawk.
He thupek zawm lote chu IPC Sec. 188 hmangin hrem theih an ni a. Thupek hian February ni 9, 2023 atanga thla hnih (2) chhung a huam ang.
