SIRD bultumin leh Yashwantrao Chavan Academy of Development Administration (YASHADA) Pune tawiawmna in thingtlang inrelbawlna, mipuiten tha tak leh thuk taka an kalpui avanga hmasawnna hrang hrang neia khaw hmingthang ni ta, Hiware Bazar, Ahmednagar District, Maharashtra zir chiang a Exposure Tour nei turin mi 12 te chuan Aizawl an chhuahsan a.

Exposure Tour a kal te hi Mizoram Sorkar Local Administration Department aiawh leh Backward Regions Grant Fund (BGRF) District – Saiha leh Lawngtlai District-a Autonomous District Council pathum hnuaia Local Administration Department aiawh 11 te a ni a.

Exposure Tour thlahna programme tawi Home Minister Pu R.Lalzirliana Pisa-a buatsaih ah hian, Pu R Lalzirliana chuan SIRD ten inrelbawlna kawnga zir tur leh intuaihriam tura mi an tir chhuah thei chu fakawm a tih thu a sawi a. Minister chuan Exposure Tour a kal tur te chu ram hmangaihtu an nih tih hre reng chunga hlawk taka rah tha rawn pawchhuah turin a chah a ni.

Exposure Tour hi Backward Regions Grant Fund (BRGF) hnuaia a kalpui mek Capacity Building & Training (CB&T) Component-a hmalakna pawimawh tak ni turin leh, grassroots level-a Planning & Implementation-a hma kan sawn phah beiseiin buatsaih a ni. He Exposure Visit programme hi kum 2010-2011 atang tawh khan neih tum a ni tawh na in, harsatna engemaw avangin thulh leh a lo ni thin.

Hiware Bazar hi Ahmednagar District, Maharashtra a ni a. He thingtlang khaw te tak te, In 250 vel bawr ni thin hi kum 1989 hma lama a khaw dinhmun chhe tak atangin he mi kuma a khaw mipui thalai lamte rilru insiam tharin an Sarpanch/VCP atana Pu Popatrao Pawar-a an thlan tak atanga lo danglam ta em em mai a ni a. A hnu lamah chuan an khaw economy alo that tak em avangin eizawnna tur dapa hmun danga pem chhuakte pawh an let leh hial a ni.

Hetianga an lo than chhoh takna chhan ber hi an khaw hmasawnna hna reng reng mipuite duh ang leh tha an tih ang zela lang tlang leh inlungrual taka thawkin, an tlakchham phuru turin Sorkar kut nghak mai lovin an mamawhna zawnah mipuite’n thahnemngai taka hma an lak zel vang a ni a. Tualchhung inrelbawlna leh hmasawnna kawng tam takah National Level Award thahnem tak an lo dawng tawh a, World Bank leh Asian Development Bank-te pawhin an ngaihven hle thin a ni .

Mizoram chhungah programme planning & implementation ah mipui an la inhnamhnawih tlem em em a. Programme Guidelines ten thuneihna a pe tih an hriat tawk loh bakah, mipuite tel ngeia thil tih a that bikna tam takte hi hriat chian leh tihve nachang an hriat a tul hle a ni. Hemi avang hian exposure visit programme hi beiseina sang tak neiin BRGF Capacity Building Action Plan-ah telh a lo ni.