Vawiin hian Lawngtlai District Level Fire Prevention Committee ruahmanin District Fire Prevention Committee member ten Addl. DC Pu R. Lalsangluaia hovin khaw pathum R. Vanhne, Paithar leh Upper Saikah khuaah te ram kang laka inven pawimawhna mipuite zirtirna hun (Awareness) an hmang.

Heng khaw thlanbik pathumah te hian kangmei laka ram venhim tulna inhrilhhriat tharna hun hman hmasak nise tia District Level Fire Prevention Committee in a lo rel tawh angin vawiinah hian Addl. DC Pu R. Lalsangluaia bakah Pu Lalchhandama, DCF, Lawngtlai, Pu K. Saitluanga, IPRO leh Pu K. Lalromawia, DCCF LADC te an kal a, heng Officers te hian kangmei, a bik takin ram kang vanga kan ramin harsatna a tawh chhoh zel dan leh kangmei laka inven kan mamawh zia uluk takin an zirtir hlawm a ni.

Heng khaw hrang hrangah te hian District Level Committee chuan nikum lama kangmei laka tha taka an inven hlawm avanga lawmthute hrilh nghalin, kuminah pawh nasa leh zuala bei a, nikum ang bawka lawmman pakhatna la leh thei tura theihtawp chhuahpuiah a sawm bawk.

Heng khaw pathuma khawtlang hruaitute hian kangmei laka invenna an kalpui dante, hmachhawp an neih hrang hrangte an sawi ve bawk a ni.

Lawngtlai District Level Fire Prevention Committee chuan, heng khuate bakah hian Phawngpui Tlang leh a chhehvel khuateah tunah hian Fire Prevention Awareness Campaign a kalpui mek bawk a. District chhung mipui zawng zawngte chu theihtawp chhuah theuh tura sawmin, kangmei tichhuak palh leh dan pawisa lote chunga hmalak dan turte pawh ruahmanna a siam a ni.

Attachment

  • Loading attachment...