No.36/2021-2022  

Dated Champhai, the 7th April, 2021: Vawiin khan District Disaster Management Authority (DDMA) Champhai District buatsaihin Khawbung RD Block huamchhunga Village Disaster Management Committee (VDMC) te tan ‘Capacity Building Training’ I&PR Auditorium Champhaiah buatsaih a ni.

He hun hmanpuitu Dr.Lallawmkima, DIPRO Champhai chuan DDMA hmalakna kaltlanga chhiatrupna thlen thulha chechhuaka ruahmanna siam zung zung tura din Village Disaster Management Committee-te puala inzirtirna hun buatsaih a ni thei chu lawmawm a tih thu sawiin, mihringte chu inzirthara intuaihhriam reng tur kan ni, a ti a. Chhiatrupna thlengte chu hriat lawk a nih thin loh avangin hmachhawn thei tura lo inpuahchah leh mithiam te’n zawm tur tul min hrilh thinte thuawih taka zawm chu kan tih theih leh keimahni intanpuina pawimawh tak a nih thu a sawi a. Village Disaster Management Committee member-te chu khawtlangin a mamawh huna che chhuak vat thei tur leh zir thiamna leh tawnhriat an neihte chhawr tangkaia midangte pui thei tura inkau reng turin a chah a. An tana training buatsaih chu hriatna leh thiamna tipungtu atana tangkai tak a nih dawn thu sawiin, training hlawkthlak tak hmang thei tura duhsakna hlanin Village Disaster Management Committee puala Capacity Building Training buatsaih chu a hawng a ni.

Vawiina training-ah hian resource person Pu VL. Hruaimawia, District Organizer, DM&R Champhai hnen atangin Village Disaster Management Committee din dan leh Village Disaster Management Plan siam dan chungchang bakah State Disaster Response Fund (SDRF) inkaihhruaina leh dante ngaihthlak a ni a. VDMC training-te hnenah hian Covid-19 dona kawnga pawimawh tak leh invenna tur kut silfaina sahbawn thahnem tak sem chhuah a ni bawk.

Training-ah hian Khawbung RD Block huamchhunga Village Disaster Management Committee (VDMC) member 35 an tel thei a ni.